Read Biatah Bidayuh PINYIRUAH 33 Bible Online

PINYIRUAH 33 - Biatah Bidayuh bible

PINYIRUAH 33

¹ TUHAN nang di Moses, “Tingge tarun ati, kuu ngga bara daya adi kuu taban ngga ruah so Egypt; di ka tarun tana adi Aku ko bijanji an nggen di Abraham, Isaac, ka Jacob ka di bara sesang ngara.

²Aku re pait malaikat da nguru angān, ka Aku re pibu daya Canaan, daya Amor, daya Hitti, daya Periz, daya Hivi, ka daya Jebus.

³Angān re di ka tarun tana adi kaya ka damŭn. Pak Aku dŭh re panu ngga angān, amai angān daya adi baking; Aku pirabur angān di atang aran rai-i.”

⁴Kan bara daya dingah sakanŭ, ngara rasu susah mun daya ngurid ka dŭh tia pakai mas pirak ngara.

⁵Amai TUHAN mbŭh pesan Moses da kidaan di ngara, “Angān daya adi baking. Kambŭi Aku panu ngga angān tatu Aku re pirabur angān. Kadi so adŭp ngan mas pirak ngan, ka Aku re natu simuki Aku re ngga angān.”

⁶Jadi ripas ngara mbŭh bu so Darŭd Sinai, bara daya Israel mbŭh dŭh tia pakai mas ngga pirak.

⁷Niap kari daya Israel bibari, Moses ari pijog Bari adi kudus anŭ mua juan-i di sapa tarun yŭn bibari. Bari anŭ dog kadŭn Bari TUHAN, ka asi asi adi raan bidapŭd ka bisiken ngga TUHAN, ayŭh di kamanŭ.

⁸Niap kari Moses di kamanŭ, bara daya mijog di baŭm tiban bari adŭp ngara, tingga Moses panu ndŭg ka ayŭh mbŭh mŭrŭt ka darŭm-i.

⁹Kan Moses mbŭh mŭrŭt, tŭngŭn abun mūn ka rŭŭ di baŭm tiban Bari TUHAN, ka TUHAN minyu ngga Moses so abun anŭ.

¹⁰Kan bara daya kiris tŭngŭn abun anŭ di baŭm tiban Bari TUHAN, ngara mutu ubak.

¹¹TUHAN minyu situra jawin ngga Moses mun daya minyu ngga jerā-i. Komŭnŭ Moses pari ka yŭn ngara bibari. Pak sianŭ adi mara, adi pinurung-i, Joshua anak Nun, rŭŭ di Bari TUHAN.

¹²Moses kidaan di TUHAN, “Taŭn Kaam mbŭh kidaan di aku da nguru bara daya ati ka tarun tana anŭ. Pak Kaam dŭh kidaan asi re Mai pait ayō aku. Kaam mbŭh nang Kaam puan aku ka asŭng Mai munos di aku.

¹³Madin kambŭi Kaam sawŭ, kidaan di aku atur-pinyiraan Mai, isa aku bisa babŭ bituan di Kaam ka pimunos asŭng Mai. Ingat meh gŭh Kaam mbŭh mien bangsa ati da jadi tung jamai.”

¹⁴TUHAN nang, “Aku re panu ngga angān, ka nggen pimanang di angān.”

¹⁵Moses nam, “Kambŭi Kaam dŭh panu ngga kieh, dŭhnyah bada kieh bu so tarun ati.

¹⁶Simuki daya re bisa puan nang Kaam munos asŭng di daya Mai ka di aku kambŭi Kaam dŭh panu ngga kieh? Kambŭi Kaam agi ngga kieh, kieh tungang dog ngatŭn so tadŭ tadŭ bangsa bŭkŭn di ong.”

¹⁷TUHAN nang di Moses, “Aku re ndai nanyam ka pimite mu, amai Aku puan kuu, ka asŭng Ku munos di kuu.”

¹⁸Komŭnŭ Moses mite, “TUHAN turung bada aku tingga jawa bragah Mai.”

¹⁹ TUHAN nam, “Aku re bada jawa bragah Ku murah di sirung jawin mu ka di sirung jawin mu Aku re kidaan adŭn kudus Ku. Aku adi TUHAN, ka Aku kiren pinyirindu ngga pinyirasi Ku di daya adi Aku mbŭh mien.

²⁰Aku dŭh re bada kuu tingga jawin Ku, amai mating daya adi tingga jawin Ku re tungang udip,

²¹pak digiti agi yŭn adi sindŭk Aku yŭn mu bisa mijog di tunduh batuh.

²²Kan sekar jawa bragah Ku murah kuu, Aku re na kuu di sapad batuh, ka nutu kuu ngga tangan Ku ndŭg ka Aku mbŭh murah rewan kuu.

²³Ripas anŭ Aku re kadi tangan Ku, ka kuu re kiris punok Ku adŭ, dŭh jawin Ku.”