Read Biatah Bidayuh PINYIRUAH 34 Bible Online

PINYIRUAH 34 - Biatah Bidayuh bible

PINYIRUAH 34

¹TUHAN nang di Moses, “Ndai duwŭh kiping batuh da mun adi sibungas-i, ka Aku re nuris dieh bang piminyu adi Aku ko nuris di kiping anŭ adi diŭ adi kuu ko mape.

²Sidia adŭp mu isan isan andu sipagi, maad ka tibung Darŭd Sinai ka bidapŭd ngga Aku diginŭ.

³Mating daya siŭn maad ayō kuu; mating daya siŭn dog kiris di tadŭ yŭn di darŭd anŭ; ka mating biri puan kah sapi siŭn man kupai di sigŭn darŭd anŭ.”

⁴Jadi Moses ndai duwŭh kiping batuh, ka isan isan andu jawa ndi ayŭh taban-i ngga maad Darŭd Sinai, nanyam adi TUHAN mbŭh bada.

⁵TUHAN mūn darŭm abun, ka mijog sindŭk Moses diginŭ, Ayŭh rasu kidaan adŭn kudus-I, adi TUHAN.[31]

⁶ TUHAN murah sirung jawin Moses ka nang, “Aku adi TUHAN, ka Aku kiren pinyirindu ngga pinyirasi ka dŭh udah tuas, ka adi kiren pinyirindu bās ngga pinyitŭtŭd.

⁷Aku ingat janji Ku yŭn biribu ribu turap manusia,[32] ka apun arap ngga dosa; pak Aku dŭh re kambŭt ngukum sesang manusia ndŭg taruh ngga pat turap amai dosa pimas ngara.”

⁸Moses bigaut mutu ubak-i nyambah.

⁹Moses nang, “TUHAN, kambŭi asŭng Mai sawŭ munos di aku, aku mite Kaam sua panu ngga kieh. Ngara ati daya baking, pak apun sarah ngga dosa ami, ka trima kieh jadi daya Mai.”

¹⁰TUHAN nang di Moses, “Madin Aku ndai simanya ngga daya Israel. Di sirung jawin ngara Aku re ndai kayuh bās, adi bŭn dog ndai di tadŭ tadŭ yŭn di ong di dupan tadŭ tadŭ bangsa. Sopŭrŭg daya re kiris munki masam bās kayuh adi Aku, adi TUHAN, tungang ndai sabab Aku re ndai kayuh bās yŭn mu.

¹¹Tunda ukum-adat adi Aku ko nggen di kuu andu ati. Aku re pibu daya Amor, daya Canaan, daya Hitti, daya Periz, daya Hivi, ka daya Jebus sitadŭn angān masang panu.

¹²Dŭhnyah kuu ndai tadŭ masam pekat ngga daya di rais anŭ adi angān re mŭrŭt, amai anŭ bisa jadi jarat di angān.

¹³ Pati ka nŭŭh nyirubuh adŭ mija mija-sambah ngara. Uros uros-batuh pirapu' ngara angān an pirusak, ka tandā tandā pinatŭng tapa Asherah ngara angān an tabŭng.

¹⁴“Dŭhnyah nyambah tadŭ tadŭ tapa bŭkŭn, sabab Aku adi TUHAN, dŭh raan kiris angān nyambah tapa adi bŭkŭn.

¹⁵Dŭhnyah ndai tadŭ pekat ngga daya di rais anŭ, sabab kan ngara nyambah tapa tapa adat karŭm ngara ka jugan sadis ka tapa tapa anŭ, ngara re ngaja angān da sua, ka angān meh re ripong di pinguman adi ngara ko jugan ka tapa tapa ngara.

¹⁶Anak dari ngan bo tipia raan sawŭn dayung ngara, adi re taban ngara da dŭh tŭtŭd di Aku ka nyambah tapa tapa bŭkŭn.

¹⁷ “Dŭhnyah ndai tibudo so basi ka nyambah-i.

¹⁸ “Sita Gawai Ruti dŭh-Biragi. Nanyam adi Aku ko pesan di kuu, man ruti dŭh-biragi ju andu darŭm buran Abib, amai di buran anŭ angān ruah so Egypt.

¹⁹ “Sopŭrŭg anak pinuai dari ngga anak bungas dāng kudip adi dari inŭh Aku dapu,

²⁰ pak angān an jugan anak biri ngga nubos barang pŭrŭng anak bungas kaldi. Kambŭi dŭh ndai simŭnŭ, mata tungo kaldi anŭ. Angān dŭh siŭn dŭh an nubos anak pinuai ngan. “Mating daya siŭn bidapŭd ngga Aku kambŭi dŭh taban sadis.

²¹ “Angān biyŭn nŭm andu ngga ndai kraja ngan, pak dŭhnyah nyiraja di andu adi ju, dŭh gŭh di tipuh majak puan kah di tipuh ngatŭm.

²² “Sita Gawai Pingatŭm kan angān piguru ngatŭm buwa bungas gandom ngan. Sita Gawai Bari-dawŭn di tipuh jaya kan angān nguruk buwa pimuruh ngan.

²³“Pitaruh saba darŭm ndi sawa sopŭrŭg dari ngan dŭh siŭn dŭh mandŭg di nyambah Aku, adi TUHAN, adi Tapa daya Israel.

²⁴Ripas Aku muko pibu bangsa bangsa bŭkŭn ka nambah tarun tana ngan, mating daya re suba nyerang rais ngan darŭm tipuh taruh gawai anŭ.

²⁵ “Dŭhnyah jugan ruti adi biragi kan angān nyadis dāng ka Aku. Dŭhnyah nyikŭn ndŭg isan isan andu jawa ndi kada dagin dāng adi angān ko siŭ yŭn Gawai Paska.

²⁶ “Barang sawa angān an taban ka ramin TUHAN buwa bungas adi siabo kana adi angān ngatŭm. “Dŭhnyah tanŭk anak biri puan kah anak kambing darŭm sisuh sindŭ-i.”

²⁷TUHAN nang di Moses, “Nuris pinganang anŭ, amai bisangan di pinganang anŭ Aku ndai simanya ngga kuu ka ngga daya Israel.”

²⁸Moses rŭŭ diginŭ ngga TUHAN pat puru andu pat puru ngarŭm dŭh man dŭh nok. Ayŭh nuris di kiping kiping batuh anŭ pinganang simanya, anŭ inŭh Simŭng Pinyipesan.

²⁹ Kan Moses mūn so darŭd Sinai taban Simŭng Pinyipesan anŭ, jawin-i nyirinyak amai ayŭh ko minyu ngga TUHAN. Pak adŭp-i dŭh rada.

³⁰Aaron ngga sopŭrŭg daya samah tingga Moses ka kiris jawin-i nyirinyak, ka sopŭrŭg daya taru nyindŭk ayŭh.

³¹Pak Moses bagan ngara, ka Aaron ngga sopŭrŭg pinguru daya Israel di ka ayŭh, ka Moses minyu ngga ngara.

³²Ripas anŭ, sopŭrŭg daya Israel tikuruk maning ayŭh; Moses nggen di ngara sopŭrŭg ukum-adat adi TUHAN ko nggen di ayŭh di Darŭd Sinai.

³³Kan Moses muko minyu ngga ngara, ayŭh nutu jawin-i ngga taŭb.

³⁴Kan Moses di ka Bari TUHAN di minyu ngga TUHAN, ayŭh kadi taŭb anŭ. Kan ayŭh ruah, ayŭh kidaan di daya Israel sopŭrŭg kayuh adi TUHAN ko pesan di ayŭh da kidaan,

³⁵ka ngara kiris jawin-i nyirinyak. Komŭnŭ ayŭh pari na taŭb anŭ di jawin-i ndŭg ka andu adi ngga-i di minyu ngga TUHAN dinge.