Read Biatah Bidayuh PINYIRUAH 35 Bible Online

PINYIRUAH 35 - Biatah Bidayuh bible

PINYIRUAH 35

¹Moses bagan sopŭrŭg daya Israel bada tikuruk ka nang di ngara, “Ati inŭh kayuh adi TUHAN mbŭh pesan di angān da ndai:

² Angān biyŭn nŭm andu ngga angān ndai kraja ngan, pak andu adi ju taŭn-i andu adi kudus, andu ngga rŭŭ so kraja ka mbŭh dog nitah ka Aku adi TUHAN. Asi asi adi nyiraja andu anŭ dŭh siŭn dŭh dog ukum kabŭs.

³Dŭhnyah gŭh tung apui di arŭn ngan di andu Sabbath.”

⁴Moses nang di sopŭrŭg daya Israel, “Ati inŭh kayuh adi TUHAN ko pesan:

⁵Jugan pinganggen ka TUHAN. Barang naan daya adi raan ndai simŭnŭ siŭn taban pinganggen mas, pirak puan kah timaga;

⁶banang linen adi duduh; banang buruh biri adi biru, adi bēng, adi bireh; banang adi dog ndai so buruh kambing;

⁷kurit dari biri adi dog nyamŭk bireh; birurang adi duduh; kayuh acacia;

⁸inyo yŭn prita; rapah rapah yŭn inyo kudus ka yŭn kimanyan adi buuh ramak;

⁹batuh batuh akek bireh ngga batuh batuh bŭkŭn adi brega adi re dog pirakat di efod ka di tapas-sudo Imam Bās.

¹⁰“Sopŭrŭg ngara adi pandai bitukang so dupan ngan an samah mandŭg ka ndai barang masam kayuh adi TUHAN ko pesan:

¹¹Bari TUHAN, tutu-i ka tutu sapa-i, dudu sikait-i ka sibukah-i, parang-i, tiang-i, ka bangan-i;

¹²Pati Simanya, pinawid-i, tŭtŭp-i, ka banang tabir adi ngga matŭn-i;

¹³mija, pinawid-i, ka sopŭrŭg pingakas-i; ruti adi dog jugan ka Tapa;

¹⁴rika prita ngga da jawa-i tatŭng ka pingakas-i; prita prita ngga inyo-i;

¹⁵mija adi yŭn badang kimanyan ka pinawid-i; inyo kudus; kimanyan adi buuh ramak; banang tabir yŭn tiban Bari TUHAN;

¹⁶Mija-sambah adi yŭn badang sadis, ngga radai timaga-i dog piguru dieh, pinawid-i, ka sopŭrŭg pingakas-i; sambong-pinyingu ngga bangan-i;

¹⁷banang banang tabir adi ngga muwang, tiang tiang ka bangan-i; banang tabir yŭn tiban buwang;

¹⁸pagu pagu-i ka taris yŭn Bari TUHAN ka buwang;

¹⁹piraka piraka adi sangŭn adi bara imam nēn kan ngara ndai kraja di Yŭn Kudus, ka piraka kudus yŭn Aaron adi imam ka yŭn bara anak-i.”

²⁰Sopŭrŭg daya Israel bu maad,

²¹ka barang naan adi raan, taban pinganggen ngara ka TUHAN ngga ndai Bari TUHAN. Ngara taban tadŭ tadŭ kayuh adi biguna ngga bisambah ka ngga ndai piraka imam.

²²Sopŭrŭg adi raan, dari bait dayung, taban krusang, sigating, sisin, kukong, ka barang masam pimakai mas ka nitah-i ka TUHAN.

²³Barang naan daya adi biyŭn banang linen adi duduh, banang buruh biri adi biru, adi bēng, ka adi bireh; banang adi dog ndai so buruh kambing; kurit dari biri adi dog nyamŭk bireh; puan kah birurang adi duduh, taban sopŭrŭg-i.

²⁴Sopŭrŭg adi tungang nggen pirak puan kah timaga taban pinganggen ngara ka TUHAN, ka sopŭrŭg adi biyŭn kayuh kayuh acacia adi bisa dog pakai ngga ndai tadŭ tadŭ kraja, taban sopŭrŭg-i.

²⁵Sopŭrŭg bara dayung adi pandai bijiit taban tiburi linen adi duduh ka tiburi buruh biri adi biru, adi bēng ka adi bireh, adi ngara ko ndai.

²⁶Ngara ndai gŭh tiburi so buruh kambing.

²⁷Bara pinguru taban batuh akek bireh ka batuh batuh brega adi bŭkŭn adi re dog pirakat di efod ka tutu-sudo

²⁸ka rapah rapah ka inyo yŭn prita prita, ka yŭn inyo kudus, ka yŭn kimanyan adi buuh ramak.

²⁹Sopŭrŭg daya Israel adi raan, taban pinganggen ngara ka TUHAN yŭn kraja pingandai adi Ayŭh ko pesan di Moses da ndai.

³⁰Moses nang di daya Israel, “TUHAN mbŭh mien Bezalel, anak Uri ka sukuh Hur, so tibaran-asar Judah.

³¹Tapa mbŭh ngisi ayŭh ngga kuasa-I[33] ka mbŭh nggen di ayŭh pimandai, pinyibisa, ka pinyimirati yŭn barang masam kraja pingandai bibutik,

³²yŭn ngatur butik butik adi grua ka ndai-i ngga mas, pirak ka timaga;

³³yŭn mire kapŭg batuh brega adi re dog pirakat; ka yŭn mŭŭt mutik kayuh; ka yŭn barang masam kraja pingandai bibutik adi bŭkŭn.

³⁴TUHAN mbŭh nggen di ayŭh ka di Oholiab anak Ahisamach, so tibaran-asar Dan, pinyibisa adi ngga ngajar pimandai ngara di daya bŭkŭn.

³⁵TUHAN mbŭh nggen di ngara pimandai di barang masam kraja daya adi tukang mŭŭt, adi tukang mutik, ka adi tukang nanun linen adi duduh; buruh biri adi biru, adi bēng, ka adi bireh; ka banang adi bŭkŭn. Ngara pandai ndai barang masam kraja ka samah pandai mutik.