Read Biatah Bidayuh PINYIRUAH 36 Bible Online

PINYIRUAH 36 - Biatah Bidayuh bible

PINYIRUAH 36

¹“Bezalel, Oholiab, ka sopŭrŭg tukang adi TUHAN mbŭh nggen pimandai ngga pinyimirati, adi puan munki ndai sopŭrŭg kayuh adi biguna ngga pijog Bari TUHAN, an ndai sopŭrŭg-i nanyam adi TUHAN mbŭh pesan.”

²Moses bagan Bezalel ngga Oholiab, samŭn sopŭrŭg adi bŭkŭn adi pandai adi TUHAN mbŭh nggen pimandai ka adi raan turung, ka Moses bada ngara piguru nyiraja.

³Ngara trima so Moses, sopŭrŭg pinganggen adi bara daya Israel mbŭh taban ngga ndai Bari TUHAN. Pak daya Israel adu adu taban ka Moses pinganggen ngara barang isan.

⁴Komŭnŭ ngara anŭ adi bitukang adi ndai kraja anŭ di

⁵ka kidaan di Moses, “Bara daya mbŭh taban kayuh rabis so adi patut ngga ndai kraja adi TUHAN mbŭh pesan.”

⁶Jadi Moses pait pinganang ka bara daya da dŭh tia taban pinganggen yŭn Bari TUHAN; sawŭ meh bara daya dŭh tia taban.

⁷Anŭ adi mbŭh dog taban mbŭh rabis so sadang ngga ngamas kraja anŭ.

⁸Bara adi rabis pandai, di dupan ngara adi bitukang, ndai Bari TUHAN. Ngara ndai-i pakai simŭng rambar banang linen adi dog nanun ngga buruh biri adi biru, adi bēng, ka adi bireh ka adi dog ngabuh ngga butik butik gayŭn cherubim.

⁹Barang rambar anŭ nyimati, 12 mita ambu, ka 2 mita buka-i.

¹⁰Ngara nyiit bada bitubu rimŭh rambar bada jadi ndi tŭngŭn banang, ka simŭnŭ gŭh ngga adi bŭkŭn adi rimŭh.

¹¹Ngara ndai kajit ngga banang adi biru di sigŭn rambar anŭ tura ka sapa di so-duwŭh tŭngŭn banang anŭ.

¹²Ngara pirakat rimŭh puru kajit di sibungas rambar di sibungas tŭngŭn banang ka rimŭh puru kajit gŭh di sikasŭn rambar di sikasŭn tŭngŭn banang anŭ ndi.

¹³Ngara ndai rimŭh puru sikait mas adi ngga tubu so-duwŭh tŭngŭn banang anŭ da jadi ndi.

¹⁴Komŭnŭ ngara ndai tutu Bari TUHAN pakai simŭng ndi rambar banang adi dog ndai so buruh kambing.

¹⁵Ngara ndai sopŭrŭg rambar anŭ da nyimati, 13 mita ambu, ka 2 mita ramba-i.

¹⁶Ngara nyiit bada bitubu rimŭh rambar bada jadi ndi tŭngŭn banang, ka adi nŭm dinge di ndi tŭngŭn anŭ ndi.

¹⁷Ngara ndai rimŭh puru kajit di bŭngŭn sikasŭn rambar banang di ndi tŭngŭn, ka rimŭh puru gŭh kajit di bŭngŭn tŭngŭn anŭ ndi.

¹⁸Ngara ndai rimŭh puru sikait so timaga, ngga tubu so-duwŭh tŭngŭn banang anŭ, bada-i jadi ndi tutu.

¹⁹Ngara ndai duwŭh dinge tutu adi bŭkŭn adi dog ndai so kurit dari biri ka dog nyamŭk bireh, ka adi ndi so birurang adi duduh bada jadi turap tutu tura ka tunduh.

²⁰Ngara ndai sibukah sibukah nyipijog yŭn Bari TUHAN so kayuh acacia.

²¹Sopŭrŭg sibukah an 4 mita bigatung, ka 66 sentimita buka-i,

²²ngga ndi pasang sikuan, isa sibukah sibukah anŭ bisa dog tubu. Sopŭrŭg sibukah an biyŭn sikuan.

²³Ngara ndai duwŭh puru sibukah yŭn parad tura ka siratan,

²⁴ka pat puru bangan pirak di punda-i, duwŭh bangan yŭn barang sibukah ngga bitan sikuan-i.

²⁵Ngara ndai duwŭh puru sibukah yŭn parad Bari TUHAN tura ka utara,

²⁶ka pat puru bangan pirak, duwŭh di punda barang sibukah.

²⁷Yŭn punok Bari TUHAN, tura ka barat, ngara ndai nŭm sibukah

²⁸ka duwŭh sibukah yŭn sikuh sikuh-i.

²⁹Sikuh sikuh sibukah anŭ dog tubu di sagān ka bigagit gagit ndŭg sambu-i. Sibukah adi duwŭh adi pijadi duwŭh sikuh anŭ dog ndai simŭnŭ.

³⁰Ngapŭi agi mai sibukah, ka simŭng nŭm bangan pirak, duwŭh di punda barang sibukah.

³¹Ngara ndai simŭng rimŭh parang so kayuh acacia, rimŭh yŭn sibukah sibukah di ndi parad Bari TUHAN,

³²rimŭh yŭn sibukah di parad tura ka mandi, ka rimŭh yŭn sibukah tura ka barat, di punok.

³³Parang yun dog ndai di sitangah ajog sibukah anŭ, ka dog nganjak so tŭbŭn ndi Bari TUHAN ndŭg tŭbŭn mandi.

³⁴Ngara marut sibukah sibukah ngga mas ka pirakat-i ngga dudu sigarong mas ngga bitan dudu parang adi dog marut ngga mas gŭh.

³⁵Ngara ndai ndi tabir banang linen adi duduh, dog nanun ngga buruh biri adi biru, adi bēng, ka adi bireh ka ngabuh-i ngga butik butik gayŭn cherubim.

³⁶Ngara ndai pat tiang so kayuh acacia ngga pijog tabir anŭ, ka tiang tiang anŭ dog marut ngga mas, ka pirakat dieh sikait mas. Komŭnŭ, ngara ndai pat bangan pirak yŭn piguru tiang tiang anŭ.

³⁷Yŭn tiban Bari TUHAN anŭ ngara ndai tabir so banang linen adi duduh, ka adi dog nanun ngga buruh biri adi biru, adi bēng, ngga adi bireh ka ngabuh-i ngga butik bunga jiit.

³⁸Yŭn tabir anŭ ngara ndai rimŭh tiang adi biyŭn sikait dieh, ka marut tibung-i ka anak anak parang-i ngga mas, ka ndai rimŭh bangan so timaga yŭn tiang tiang anŭ.