Read Biatah Bidayuh PINYIRUAH 37 Bible Online

PINYIRUAH 37 - Biatah Bidayuh bible

PINYIRUAH 37

¹Bezalel ndai Pati Simanya so kayuh acacia 110 sentimita ambu-i, ka 66 sentimita buka-i, ka 66 sentimita bigatung-i.

²Ayŭh marut sapa ngga darŭm-i ngga tigŭrŭ mas, ka na jiri mas maning-i.

³Ayŭh ndai pat sigarong pinawid so mas, ka pirakat-i di so-pat kaja-i, ngga duwŭh sigarong di barang parad.

⁴Ayŭh ndai pinawid so kayuh acacia, ka marut-i ngga mas,

⁵ka ton-i di sigarong di so-duwŭh parad pati anŭ.

⁶Ayŭh ndai tŭtŭp-i so tigŭrŭ mas, 110 sentimita ambu, ka buka-i 66 sentimita.

⁷Ayŭh ndai duwŭh cherubim so mas adi dog maba,

⁸da biraku duwŭh tŭbŭn tŭtŭp anŭ, isa-i sinyadi ngga tŭtŭp anŭ.

⁹Cherubim cherubim anŭ nura dingan-i di tunduh tŭtŭp anŭ, ka urad urad-i tiburai nutu tŭtŭp anŭ.

¹⁰Ayŭh ndai mija anŭ so kayuh acacia, ambu-i 88 sentimita, buka-i 44 sentimita, ka bigatung-i 66 sentimita.

¹¹Ayŭh marut-i ngga tigŭrŭ mas, ka ndai so mas jiri bŭngŭn-i.

¹²Ayŭh ndai triding-i, ka tabar-i 7.5 sentimita ka ndai jiri ngga mas maning triding anŭ.

¹³Ayŭh ndai pat sigarong pinawid so mas, ka pirakat-i di so-pat sikuh di yŭn kaja mija anŭ.

¹⁴Sigarong adi yŭn kasŭk pinawid ngga tawid mija anŭ dog pirakat sindŭk triding-i.

¹⁵Ayŭh ndai pinawid so kayuh acacia ka marut-i ngga mas.

¹⁶Ayŭh ndai so tigŭrŭ mas pinggen, saker, tipayan ka makuk yŭn sadis wain.

¹⁷Ayŭh ndai rika prita so tigŭrŭ mas. Ayŭh ndai kaja ngga tŭngŭn-i so mas adi dog maba; abuh bunga samŭn pusu ngga rarak-i sinyadi ngga rika prita anŭ.

¹⁸Nŭm anjak sakap so tŭngŭn-i, taruh sakap di barang parad.

¹⁹Barang sakap anŭ adi nŭm agi abuh bunga dieh adi mun rarak bunga almond adi biyŭn pusu ka dawŭn rarak.

²⁰Tŭngŭn rika prita anŭ biyŭn pat abuh bunga adi mun rarak bunga almond adi biyŭn pusu ka dawŭn rarak.

²¹Agi ndi pusu di punda barang daan sakap sakap anŭ.

²²Pusu pusu, daan sakap sakap anŭ, ngga rika prita anŭ sinyadi ndi tŭngŭn dog ndai so tigŭrŭ mas adi dog maba.

²³Ayŭh ndai ju prita yŭn ndi rika prita anŭ, ka-i ndai gŭh dudu satip ngga par par so tigŭrŭ mas.

²⁴Ayŭh pakai 35 kilogram tigŭrŭ mas ngga ndai rika prita anŭ samŭn pingakas pingakas-i.

²⁵Ayŭh ndai ndi mija so kayuh acacia yŭn badang kimanyan. Mija anŭ inŭh misagi, 45 sentimita ambu, ka buka-i 45 sentimita, ka 90 sentimita bigatung-i. Junggir-i di so-pat sikuh-i sinyadi ngga mija anŭ.

²⁶Ayŭh marut tunduh-i samŭn pat tigang-i ka junggir-i ngga tigŭrŭ mas, ka ndai jiri-i so mas maning-i.

²⁷Ayŭh ndai duwŭh sigarong pinawid so mas di sagān jiri-i di so-duwŭh parad tigang-i, yŭn kasŭk pinawid adi ngga-i dog tawid.

²⁸Ayŭh ndai pinawid anŭ so kayuh acacia ka marut-i ngga mas.

²⁹ Ayŭh ndai gŭh inyo kudus samŭn tigŭrŭ kimanyan adi buuh ramak adi dog gaur mun wangi.