Read Biatah Bidayuh PINYIRUAH 38 Bible Online

PINYIRUAH 38 - Biatah Bidayuh bible

PINYIRUAH 38

¹Yŭn badang sadis, ayŭh ndai mija-sambah so kayuh acacia. Mija-sambah anŭ misagi, 2.2 mita ambu-i, 2.2 mita buka-i, ka 1.3 mita bigatung-i.

²Ayŭh ndai junggir junggir-i di sambu so-pat sikuh-i, siŭn-i sinyadi ngga adŭp mija-sambah anŭ. Ayŭh marut mija-sambah anŭ ngga timaga.

³Ayŭh ndai gŭh sopŭrŭg pingakas mija-sambah anŭ: priok, sanduk, makuk, sikait, ka tipaku tipaku apui. Sopŭrŭg pingakas pingakas anŭ dog ndai so timaga.

⁴Ayŭh ndai radai timaga adi na-i di sagān triding mija-sambah, di sitangah ajog mija-sambah anŭ.

⁵Ayŭh ndai pat sigarong pinawid ka pirakat-i di so-pat sukuh-i.

⁶Ayŭh ndai gŭh pinawid so kayuh acacia, ka marut-i ngga timaga,

⁷ka kasŭk-i di sigarong sigarong adi agi di so-duwŭh parad mija-sambah. Mija-sambah anŭ mbŭh dog ndai so papan kayuh ka bigagong darŭm-i.

⁸ Ayŭh ndai sambong ngga bangan timaga-i so siramin adi dog dapu bara dayung adi nyiraja di tiban Bari TUHAN.

⁹Yŭn Bari TUHAN ayŭh ndai buwang so banang tabir linen adi duduh. Di parad ka siratan banang tabir anŭ agi 44 mita ambu-i,

¹⁰adi dog pijog pakai duwŭh puru betang tiang timaga di duwŭh puru bangan timaga, ngga sikait sikait ka anak anak parang adi dog ndai so pirak.

¹¹Buwang anŭ agi brimun ngga anŭ adi di parad ka utara.

¹²Tura ka parad adi di barat banang banang tabir agi 22 mita ambu-i, ngga simŭng tiang ka simŭng gŭh bangan-i samŭn sikait sikait ka anak parang adi dog ndai so pirak.

¹³Di parad tura ka timor, adi yŭn tiban, buwang anŭ agi 22 mita buka-i.

¹⁴Di barang parad tiban anŭ agi 6.6 mita ambu banang tabir, ngga taruh tiang ka taruh bangan-i.

¹⁶Sopŭrŭg banang tabir adi dog pakai ndu buwang dog ndai so banang linen adi duduh.

¹⁷Sopŭrŭg bangan adi yŭn pijog tŭngŭn tiang mbŭh dog ndai so timaga, ka sikait sikait, anak parang, ka sakŭb tipuran tiang mbŭh dog ndai so pirak. Sopŭrŭg tiang adi maning buwang dog tubu ngga anak anak parang pirak.

¹⁸Banang tabir yŭn tiban buwang mbŭh dog ndai so banang linen adi dog nanun ngga buruh biri adi biru, bēng, bireh ka dog ngabuh ngga butik bunga jiit. Ambu-i agi 9 mita ka bigatung-i 2 mita, brimun ngga banang tabir buwang.

¹⁹Banang tabir anŭ dog pijog pakai pat tŭngŭn tiang di pat bangan timaga. Sopŭrŭg sikait-i, sakŭb tipuran tiang, ka anak parang mbŭh dog ndai so pirak.

²⁰Sopŭrŭg pagu yŭn Bari TUHAN samŭn anŭ adi dog pakai yŭn buwang mbŭh dog ndai so timaga.

²¹Ati inŭh kiang prungun basi basi adi dog pakai ngga ndai Bari TUHAN, adi yŭn duwŭh kiping batuh dog nyikŭn adi yŭn Simŭng Pinyipesan mbŭh dog nuris. Adŭp Moses mbŭh nggen ukum bada susud prungun-i dog ndai, ka mbŭh dog ndai daya Levi adi nyiraja di ribo pingatur Ithamar adi anak dari imam Aaron.

²²Bezalel, anak dari Uri ka adi sukuh Hur so tibaran-asar Judah, mbŭh ndai barang masam kayuh anŭ adi TUHAN mbŭh pesan.

²³Pinurung-i, Oholiab anak Ahisamach, adi so tibaran-asar Dan, inŭh adi jadi tukang mŭŭt, tukang mutik, ka tukang nanun banang linen adi duduh ka banang buruh biri adi biru, adi bēng, ka adi bireh.

²⁴Sopŭrŭg mas anŭ adi mbŭh dog nitah ka TUHAN yŭn Bari TUHAN bat-i 1,000 kilogram, dog nimbang nanyam ka timbang adi dog miratak di Bari TUHAN.

²⁵ Pirak adi dog dapŭd so pimirang daya Israel agi 3,430 kilogram, dog nimbang nanyam ka timbang adi dog miratak di Bari TUHAN.

²⁶Prungun kiang-i mbŭh nyikiang ngga anŭ adi mbŭh dog bayar sopŭrŭg daya adi mbŭh nggen dŭn ngara. Barang naan daya bayar kiang adi mbŭh dog natu, ka dog nimbang nanyam ka timbang adi dog miratak di Bari TUHAN. Diginŭ mbŭh agi 603,550 naan bara dari so umbur duwŭh puru sawa bait tuuh dŭ adi muko nggen dŭn ngara di tika pimirang.

²⁷So pirak, 3,400 kilogram dog pakai ngga ndai siratus bangan yŭn Bari TUHAN ka yŭn banang tabir, 34 kilogram yŭn tiap bangan.

²⁸Ngga tadŭh pirak adi 30 kilogram Bezalel ndai anak anak parang, sikait sikait yŭn tiang tiang, ka ngga ndai sakŭb sakŭb tipuran-i.

²⁹Timaga adi mbŭh dog nitah ka TUHAN bat-i agi 2,425 kilogram.

³⁰Ngga timaga anŭ Bezalel ndai bangan bangan yŭn tiburong tiban Bari TUHAN, mija-sambah timaga samŭn radai timaga-i, ka sopŭrŭg pingakas-i,

³¹bangan bangan buwang anŭ, ka yŭn tiburong tiban buwang, ka sopŭrŭg pagu yŭn Bari TUHAN ka yŭn buwang adi maning-I.