Read Biatah Bidayuh PINYIRUAH 40 Bible Online

PINYIRUAH 40 - Biatah Bidayuh bible

PINYIRUAH 40

¹TUHAN nang di Moses,

²“Pijog Bari TUHAN ngga andu adi ndi darŭm buran ndi.

³Na di darŭm-i Pati Simanya, adi brisi ngga Simŭng Pinyipesan ka na tabir di jawin-i.

⁴Taban ngga mŭrŭt mija ka na sopŭrŭg pingakas di tunduh-i. Taban gŭh rika prita ka piguru prita prita di tunduh-i.

⁵Na mija mas adi yŭn badang kimanyan di jawin Pati Simanya ka kideng tabir di tiban Bari TUHAN.

⁶Na mija-sambah adi yŭn badang sadis di rawa Bari TUHAN.

⁷Na sambong-pinyingu di asah Bari TUHAN ngga mija-sambah ka ngisi-i ngga piin.

⁸Ndai buwang kirurung tarun anŭ, ka kideng tabir di tiban-i.

⁹“Komŭnŭ nyikudus Bari TUHAN ngga sopŭrŭg pingakas pakai inyo kudus, ka sopŭrŭg-i re jadi kudus.

¹⁰Muko anŭ, nyikudus mija-sambah ngga sopŭrŭg pingakas-i ngga inyo kudus isa-i jadi sukup kudus.

¹¹Nyikudus gŭh sambong-pinyingu ngga bangan-i tunda gaya anŭ.

¹²“Taban Aaron ngga bara anak-i ka baŭm tiban Bari TUHAN, ka bada ngara pibisig adŭp ngara ngga adat mamuh.

¹³Kasŭk piraka imam di Aaron, ka nginyo ayŭh, ka ngga gaya anŭ ayŭh dog nyikudus yŭn ndai kraja Ku.

¹⁴Taban bara anak-i ka kasŭk jipo anŭ di ngara.

¹⁵Komŭnŭ nginyo ngara, nimun kuu nginyo sama ngara, isa ngara bisa jadi imam yŭn Ku. Dog nginyo simŭnŭ re bada ngara adu adu jadi imam.”

¹⁶Moses ndai sopŭrŭg anŭ nanyam adi TUHAN ko pesan di ayŭh.

¹⁷Sabab anŭ meh, ngga sibungas andu darŭm sibungas buran darŭm sawa adi duwŭh ripas ngara ruah so Egypt, Bari TUHAN mbŭh dog pijog.

¹⁸Moses piguru bangan bangan-i, pijog turang turang bari, pasang parang, ka pijog tiang tiang-i.

¹⁹Ayŭh na banang tutu di tunduh Bari TUHAN, ka nunduh-i ngga tutu tura ka tunduh, nanyam adi TUHAN ko pesan.

²⁰Komŭnŭ ayŭh tambit duwŭh kiping batuh anŭ ka na-i di darŭm Pati Simanya. Ayŭh kasŭk pinawid di sigarong Pati anŭ, ka na tŭtŭp-i.

²¹Komŭnŭ ayŭh na Pati anŭ darŭm Bari TUHAN ka kideng tabir. Simŭnŭ ayŭh matŭn Pati Simanya, nimun adi TUHAN ko pesan.

²²Moses na mija di darŭm Bari TUHAN, tura ka utara di sapa tabir,

²³ka na di tunduh-i ruti adi dog jugan ka TUHAN, nimun adi TUHAN ko pesan.

²⁴Ayŭh na gŭh rika prita di darŭm Bari TUHAN tura ka siratan bistatang ngga mija anŭ,

²⁵ka diginŭ, di yŭn TUHAN, ayŭh tung prita prita anŭ nimun adi TUHAN ko pesan.

²⁶Ayŭh na mija mas anŭ di darŭm Bari TUHAN di jawin tabir,

²⁷ka badang kimanyan adi buuh ramak, nimun adi TUHAN ko pesan.

²⁸Ayŭh kideng tabir di tiban Bari TUHAN,

²⁹ka diginŭ di jawin tabir ayŭh na mija-sambah yŭn badang sadis. Di tunduh mija-sambah anŭ ayŭh nyadis sadis badang ngga sadis ruwang kayuh, nimun adi TUHAN ko pesan.

³⁰Ayŭh na sambong-pinyingu di asah Bari TUHAN ngga mija-sambah, ka ngisi-i ngga piin.

³¹Moses, Aaron, ngga bara anak dari-i ngu kaja ngga tangan ngara diginŭ

³²kan ngara re mŭrŭt Bari TUHAN bait tudu mija-sambah, nimun adi TUHAN ko pesan.

³³Moses pijog buwang kirurung Bari TUHAN ka mija-sambah, ka kideng tabir di tiban buwang anŭ. Simŭnŭ ayŭh ngamas sopŭrŭg kraja anŭ.

³⁴ Komŭnŭ abun nutu Bari TUHAN ka jawa bragah TUHAN ngisi-i.

³⁵Sabab anŭ, Moses dŭh bisa mŭrŭt Bari TUHAN.

³⁶Daya Israel bipindah so nŭ adŭ-i kan abun makat so Bari TUHAN.

³⁷Ngara dŭh mindah bari ngara atas abun gibabŭ diginŭ.

³⁸Sitadŭn ngara bigandon ngara ari kiris abun TUHAN di tunduh Bari anŭ sandu, ka jireb apui nyirungan-i singarŭm.