Read Biatah Bidayuh PINYIRUAH 6 Bible Online

PINYIRUAH 6 - Biatah Bidayuh bible

PINYIRUAH 6

¹ Jadi TUHAN nang di Moses, “Madin kuu re kiris kayuh adi re Ku ndai di raja. Aku re takan ayŭh bada piruah daya Ku. Sawŭ, Aku re takan ayŭh da pibu ngara so rais-i.”

²Tapa minyu di Moses nang-I, “Aku ati TUHAN.

³Aku nandŭng di Abraham, di Isaac, ka di Jacob nimun Tapa Bisa-pŭrŭg, pak Aku dŭh bada ngara puan Aku ngga adŭn kudus Ku, adi TUHAN.[7]

⁴Aku muko gŭh ndai simanya Ku ngga ngara, bijanji an nggen di ngara tarun tana Canaan, tarun tana adi ngara ko yŭn rŭŭ dawŭ-i di jaman ngara gibabŭ daya pinami diginŭ.

⁵Madin Aku mbŭh dingah sidaing bara daya Israel adi daya Egypt mbŭh piurun, ka Aku mbŭh ingat simanya Ku.

⁶Ngapŭi kidaan di daya Israel nang Aku kidaan di ngara, ‘Aku ati TUHAN; Aku re pirupas angān so dog piurun daya Egypt. Aku re pakai tangan Ku adi bikuasa ngga ngukum ngara; komŭnŭ Aku nyiramat angān.

⁷Aku re bada angān jadi daya adŭp Ku ka Aku re jadi Tapa ngan. Angān re puan nang Aku ati TUHAN adi Tapa ngan kan Aku pirupas angān so dog piurun di Egypt.

⁸Aku re taban angān ka tarun tana adi Aku mbŭh bipayu an nggen di Abraham, di Isaac ka di Jacob. Aku re nggen-i di angān ndu bisaka ngan. Aku ati TUHAN.’ ”

⁹Moses kidaan pinganang anŭ di daya Israel, pak ngara dŭh raan dingah ayŭh amai mbŭh jimŭ bada jera-birasa darŭm ngara jadi urun.

¹⁰Komŭnŭ TUHAN nang di Moses,

¹¹“Panu ka kidaan di raja daya Egypt nang ayŭh dŭh siŭn dŭh bada bara daya Israel bu so rais-i.”

¹²Pak Moses nam, “Adŭp daya Israel dŭh gŭh an dingah kayuh adi nang ku, taya ka adŭp raja? Aku ati daya adi dŭh pandai minyu.”

¹³TUHAN pesan di Moses ngga Aaron: “Kidaan di daya Israel ngga di raja Egypt nang Aku nggen ukum bada angān duwŭh nguru daya Israel ruah so Egypt.”

¹⁴Reuben, anak pinuai Jacob, biyŭn pat madis anak dari: Hanoch, Pallu, Hezron, ngga Carmi; ngara inŭh tayung-babuk bara manak adi tarik dŭn ngara.

¹⁵Simeon biyŭn nŭm madis anak dari: Jemuel, Jamin, Ohad, Jachin, Zohar, ngga Shaul adi anak-i ngga dayung daya Canaan; ngara inŭh tayung-babuk bara manak adi tarik dŭn ngara.

¹⁶Levi biyŭn taruh madis anak dari: Gershon, Kohath, ngga Merari. Ngara inŭh tayung-babuk bara manak adi tarik dŭn ngara. Levi udip 137 sawa.

¹⁷Gershon biyŭn duwŭh madis anak dari: Libni ngga Shimei, ka ngara biyŭn bagŭ sesang.

¹⁸Kohath biyŭn pat madis anak dari: Amram, Izhar, Hebron, ngga Uzziel. Kohath udip 133 sawa.

¹⁹ Merari biyŭn duwŭh madis anak dari: Mahli ngga Mushi. Ngara inŭh bara manak Levi ngga bara sesang ngara.

²⁰Amram sawŭn sude sama-i Jochebed, adi biranak Aaron ngga Moses. Amram udip 137 sawa.

²¹Izhar biyŭn taruh madis anak dari: Korah, Nepheg, ka Zichri.

²²Uzziel biyŭn taruh madis gŭh anak dari: Mishael, Elzaphan, ka Sithri.

²³Aaron sawŭn Elisheba, anak dayung Amminadab adi jurud dayung Nahshon. Elisheba biranak Nadab, Abihu, Eleazar, ngga Ithamar.

²⁴Korah biyŭn taruh madis anak dari: Assir, Elkanah, ka Abiasaph. Ngara inŭh tayung-babuk bara kaum manak Korah.

²⁵Eleazar adi anak dari Aaron sawŭn ndi naan so bara anak dayung Putiel, adi biranak yŭn-i Phinehas. Ngara inŭh pingubak bara rawang ngga pingubak bara manak tibaran-asar Levi.

²⁶Aaron ngga Moses inŭh daya adi yŭn TUHAN nang, “Nguru tibaran tibaran-asar Israel ruah so Egypt.”

²⁷Ngara inŭh daya adi kidaan di raja Egypt da pirupas bara daya Israel.

²⁸Kan TUHAN minyu ngga Moses di tarun tana Egypt,

²⁹Ayŭh nang, “Aku ati TUHAN. Kidaan di raja Egypt sopŭrŭg kayuh adi Aku kidaan di kuu.”

³⁰Pak Moses nam, “Kaam puan aku dŭh daya adi pandai minyu; re ngga mani raja dingah kayuh adi nang ku?”