Read Biatah Bidayuh PINYIRUAH 7 Bible Online

PINYIRUAH 7 - Biatah Bidayuh bible

PINYIRUAH 7

¹TUHAN nang, “Aku re bada kuu keya ka Tapa di batŭh raja, ka jurud mu Aaron re minyu ngga ayŭh keya ka nabi mu.

²Kidaan di Aaron sopŭrŭg kayuh adi Aku kidaan di kuu, ka ayŭh re kidaan di raja bada piruah bara daya Israel so rais-i.

³ Pak Aku re bada raja baking, ka dŭh re dingah pinganang mu, sunggu munki masam bagŭ kayuh adi pitaru Aku ndai di Egypt. Komŭnŭ Aku re bada ukum adi bisā nyatŭk Egypt ka taban bara tibaran-asar daya Ku ruah so nŭ.

⁵Daya Egypt re puan meh nang Aku ati TUHAN, kan Aku pakat tangan Ku rawan ngara ka taban daya Israel ruah so rais ngara.”

⁶Moses ngga Aaron ndai nimun adi TUHAN ko pesan.

⁷Di tika ngara minyu ngga raja, Moses mbŭh 80 sawa umbur-i, ka Aaron mbŭh 83 sawa.

⁸TUHAN nang di Moses ngga Aaron,

⁹“Kambŭi raja mite angān ndai pingandai-nginga ngga nyibandar adŭp ngan, kidaan di Aaron da taran sikud-i di sirung jawin raja, ka sikud anŭ re marui jadi jippŭh.”

¹⁰Jadi Moses ngga Aaron di ka yŭn raja ka ndai nimun TUHAN mbŭh pesan di ngara. Aaron taran sikud-i di sirung jawin raja, ngga di sirung jawin bara pinurung-i, ka-i marui jadi jippŭh.

¹¹Komŭnŭ raja bagan bara daya bijak-i samŭn bara pinanung, ka ngga pimandai-i ngara ndai simŭnŭ gŭh.

¹²Ngara taran sikud ngara, ka sikud ngara marui jadi jippŭh. Pak sikud Aaron tŭrŭn sikud ngara.

¹³Pak raja gibabŭ gŭh baking ka, sak adi TUHAN ko nang, raja dŭh an dingah pinganang Moses ngga Aaron.

¹⁴Jadi TUHAN nang di Moses, “Raja mbŭh paŭh baking buang dŭh gŭh an bada daya Israel ruah so rais-i.

¹⁵Ngapŭi di bidapŭd ngga ayŭh isan isan kan ayŭh mūn di ka Yang Nile. Taban sikud anŭ adi ko jadi Jippŭh ka kajŭn ayŭh di pang piin.

¹⁶Ka kidaan di raja, ‘TUHAN, adi Tapa daya Hebrew, pait aku bada kidaan di kaam da piruah bara daya-I so rais ati, isa ngara bisa nyambah Ayŭh di tarun tana-pajam. Pak mbŭh ndŭg madin kaam dŭh an dingah pinganang-I.

¹⁷ Jadi madin, Tuan Raja, TUHAN nang kaam re puan asi Ayŭh so kayuh adi re-I ndai. Tingga, Aku re masut tunduh piin di yang ati ngga sikud ati, ka piin re marui jadi deya.

¹⁸Iken re kabŭs, ka piin re buuh, ka daya Egypt dŭh re dapŭd nok piin-i.’ ”

¹⁹Ka TUHAN nang di Moses, “Bada Aaron tambit ka pakat sikud-i, tiju sopŭrŭg tŭngŭn piin ngga parit, pagong ngga prigi, isa piin marui jadi deya, di ndi tarun tana Egypt samŭn sopŭrŭg piin adi darŭm tong kayuh, ngga adi darŭm gabuk ngga darŭm tipayan batuh.”

²⁰Moses ngga Aaron ndai nimun adi TUHAN ko pesan. Di sirung jawin raja ngga bara pinurung-i, Aaron pakat sikud-i ka masut tunduh piin Yang Nile, ka sopŭrŭg piin darŭm-i marui jadi deya.

²¹Iken darŭm piin abo kabŭs, ka piin mbŭh raru buuh ndŭg ka daya Egypt dŭh tungang nok piin-i. Deya mbŭh di barang ka yŭn-i di Egypt.

²²Komŭnŭ bara pinanung raja ndai simŭnŭ gŭh so ka pimandai ngara, ka raja babŭ baking nimun adi mbŭh. Nimun adi TUHAN ko nang, raja abah dingah pinganang Moses ngga Aaron.

²³Ayŭh tanŭ ka-i pari adŭ maad ka istana buang dŭh adŭ mbit piduri.

²⁴Sopŭrŭg daya Egypt kareh rubang di pang Yang Nile jiroh piin nok, sabab ngara mbŭh dŭh adŭ tungang nok piin so adŭp Yang Nile.

²⁵Ju andu ripuan ripas TUHAN ko masut piin.