Read Biatah Bidayuh PINYIRUAH 8 Bible Online

PINYIRUAH 8 - Biatah Bidayuh bible

PINYIRUAH 8

¹Komŭnŭ TUHAN nang di Moses, “Di ka yŭn raja ka kidaan di ayŭh TUHAN agi nang, ‘Bada daya Ku ruah, isa ngara bisa nyambah Aku.

²Kambŭi kuu abah, Aku re muno rais mu ngga tigarag.

³Yang Nile re puno da tigarag ndŭg ka sopŭrŭg-i re ruah di ka istana mu, birit mu, ambok mu, ramin ramin bara pinurung mu ka sopŭrŭg daya mu, ka simŭnŭ gŭh di oven-tana samŭn di kuari mu.

⁴Dudu tigarag anŭ re minyakir ka pŭrŭng ganan mu, di bara daya mu, ka di bara pinurung mu.’ ”

⁵TUHAN nang di Moses, “Kidaan di Aaron da pakat sikud-i di tunduh tŭngŭn tŭngŭn piin, parit ka tapo tapo piin, ka bada bara tigarag makat ka muno tarun tana Egypt.”

⁶Jadi Aaron pakat sikud-i di tunduh piin, ka bara tigarag mandŭg ka muno tarun tana Egypt.

⁷Pak bara pinanung anŭ ndai simŭnŭ gŭh so ka pimandai ngara, bada dudu tigarag ruah ka ndi tarun tana.

⁸Raja bagan Moses ngga Aaron ka nang di ngara, “Bidua ka TUHAN bada kadi sopŭrŭg tigarag ati, ka aku re piruah bara daya ngan, isa ngara bisa jugan sadis ka TUHAN.”

⁹Moses nam, “Aku re bidua yŭn mai ngga sanang asŭng ku. Miratak adŭ jam ngga ku bidua yŭn mai, yŭn pinurung mai, ka yŭn bara daya mai. Tigarag re mating tia adŭ-i di Yang Nile.”

¹⁰Raja nam, “Bidua yŭn ku sipagi.” Moses nam, “Aku re ndai nanyam pimite mai, isa kaam puan nang mating tapa adi bŭkŭn adi mun TUHAN adi Tapa ami.

¹¹Tigarag re bu so yŭn mai, so bara pinurung mai, so bara daya mai, ka re mating tia adŭ-i di Yang Nile.”

¹²Komŭnŭ Moses ngga Aaron bu so yŭn raja, ka Moses bidua ka TUHAN bada kadi dudu tigarag adi ko-I taban ka yŭn raja.

¹³TUHAN ndai nanyam pimite Moses, jadi dudu tigarag adi agi di darŭm ramin, di badag, ka di ŭmŭh ngga teya abo kabŭs.

¹⁴Bara daya Egypt nguruk tadang tigarag bada bitugung ndŭg ka tarun tana mbŭh buuh mangas da-i.

¹⁵Kan raja kiris dudu tigarag mbŭh abo kabŭs ayŭh pari baking dinge ka, sak adi TUHAN ko nang, ayŭh dŭh an dingah pinganang Moses ngga Aaron.

¹⁶TUHAN nang di Moses, “Kidaan di Aaron bada mupu tana ngga sikud-i isa runas dabu tana di ndi tarun tana Egypt marui jadi biyas.”

¹⁷Jadi Aaron mupu tana ngga sikud-i, ka sawŭ dabu tana di ndi tarun tana Egypt marui jadi biyas ka mbap di daya ngga di dāng dāng.

¹⁸Bara pinanung suba pakai pimandai ngara ngga nimbur biyas, pak ngara dŭh tungang. Mbŭh barang ka yŭn-i biyas agi,

¹⁹ ka bara pinanung anŭ nang di raja, “Tapa inŭh adi ndai kayuh ati!” Pak raja gibabŭ baking ka, sak adi TUHAN ko nang, ayŭh abah dingah pinganang Moses ngga Aaron.

²⁰TUHAN nang di Moses, “Awar isan isan andu sipagi di bidapŭd ngga raja darŭm-i mūn ka piin, ka kidaan di ayŭh TUHAN nang, ‘Bada daya Ku ruah isa ngara bisa nyambah Aku.

²¹Aku bakan kuu kambŭi kuu abah dingah pinganang Ku, Aku re bada dudu tura mandŭg ka kuu, ka bara pinurung mu, samŭn ka bara daya mu. Ramin ramin daya Egypt samŭn badag badag ngara re puno da tura.

²²Pak Aku re tandah abong Goshen, adi yŭn daya Ku rŭŭ, da mating tura dieh. Aku re ndai simŭnŭ isa kuu puan nang Aku adi TUHAN adi bikuasa di tarun tana ati.

²³Aku re ndai pingatŭn[8] di asah daya daya Ku ngga daya daya mu. Pingandai-nginga ati re jadi di andu sipagi.’ ”

²⁴TUHAN pait bara tura ka istana raja, samŭn ramin ramin bara pinurung-i. Ndi tarun tana Egypt mbŭh abo rusag bada tura.

²⁵Komŭnŭ raja bagan Moses ngga Aaron, ka nang, “Jugan sadis ka Tapa ngan digiti darŭm rais ati.”

²⁶Moses nam, “Dŭh-i batur simŭnŭ, amai bara daya Egypt taŭn re tuas kiris kieh nyadis dāng adi kieh jugan ka TUHAN adi Tapa ami. Kambŭi kieh pakai dāng ndu sadis ka bara daya Egypt kiris kieh ndai simŭnŭ, tatu ngara re manjan kieh ngga batuh ndŭg ka kieh kabŭs.

²⁷Kieh dŭh siŭn dŭh panu taruh andu ka tarun tana-pajam, di jugan sadis ami ka TUHAN adi Tapa ami, nanyam adi mbŭh-I pesan di kieh.”

²⁸Raja nang, “Aku re bada angān di jugan sadis ka TUHAN adi Tapa ngan di tarun tana-pajam, atas angān dŭh paŭh jo. Bidua yŭn aku.”

²⁹Moses nam, “Kan aku mbŭh panu, aku re rasu bidua ka TUHAN bada dudu tura andu sipagi bu so yŭn mai, so bara pinurung mu, ka so bara daya mai. Pak kaam dŭh siŭn tia nipu kieh, bait kijaman kieh di bisadis ka TUHAN.”

³⁰Moses bu so yŭn raja ka bidua ka TUHAN,

³¹ka TUHAN rasu ndai nanyam pimite Moses. Bara tura bu so yŭn raja, samŭn so yŭn bara pinurung-i, ka bara daya-i; ndi mating gŭh tura dŭm.

³²Pak kari ati gibabŭ gŭh raja baking, ka dŭh-i bada daya Israel ruah.