Read Biatah Bidayuh PINYIRUAH 9 Bible Online

PINYIRUAH 9 - Biatah Bidayuh bible

PINYIRUAH 9

¹TUHAN nang di Moses, “Di ka yŭn raja ka kidaan di ayŭh nang TUHAN adi Tapa daya Hebrew nang, ‘Bada daya Ku ruah isa ngara bisa nyambah Aku.

²Kambŭi kuu gibabŭ gŭh abah bada ngara ruah,

³Aku re ngukum kuu ngga andam adi raru bisā-i, bada nyatŭk sopŭrŭg dāng mu: kuda, kaldi, onta, sapi, biri, ka kambing kambing.

⁴Aku re ndai pingatŭn di asah dāng daya Israel ngga dāng daya Egypt, ka dāng dāng daya Israel dŭh re sua kabŭs.

⁵Aku adi TUHAN mbŭh natu andu sipagi andu adi ngga Aku ndai simŭnŭ.’ ”

⁶Andu anŭ ndi TUHAN ndai nimun adi ko-I nang, ka sawŭ sopŭrŭg dāng daya Egypt abo kabŭs, pak ndi mating gŭh dāng daya Israel kabŭs.

⁷Raja siken pasar kayuh adi mbŭh jadi, ka dog kidaan nang ndi mating gŭh dāng daya Israel kabŭs. Pak ayŭh baking ka abah bada daya Israel ruah.

⁸Komŭnŭ TUHAN nang di Moses ngga Aaron, “Tambit kudu kudu agŭm apŭk so buwang apui; Moses siŭn nabur-i di au-tarun di sirung jawin raja.

⁹Dabu apŭk anŭ re mingare mun runas di ndi tarun tana Egypt, ka di barang ka yŭn-i re jadi pirakis adi pupus di pŭrŭng ganan daya Egypt samŭn di dāng dāng ngara.”

¹⁰ Jadi ngara tambit apŭk ka mijog di sirung jawin raja, ka Moses taran apŭk anŭ ka au-tarun, ka pijadi pirakis adi pupus di pŭrŭng ganan daya ngga di dāng.

¹¹Bara pinanung mbŭh dŭh tungang situra jawin ngga Moses amai ndi ganan ganan ngara mbŭh puno da pirakis, nimun bara daya Egypt adi bŭkŭn.

¹²Pak TUHAN bada raja anŭ baking ka, sak adi TUHAN ko nang, raja abah dingah pinganang Moses ngga Aaron.

¹³Komŭnŭ TUHAN nang di Moses, “Awar isan isan andu sipagi kuu di bidapŭd ngga raja ka kidaan di ayŭh nang TUHAN adi Tapa daya Hebrew nang, ‘Bada daya Ku ruah isa ngara bisa nyambah Aku.

¹⁴Kari ati Aku dŭh re ngukum bara pinurung mu ngga bara daya mu adŭ, pak Aku re ngukum kuu ani, isa kuu puan nang mating adi bŭkŭn mun Aku di ndi ong ong.

¹⁵Kambŭi Aku pakat tangan Ku ka kudog kuu samŭn daya daya mu ngga andam, taŭn angān madin mbŭh abo binasa.

¹⁶ Pak ngga Aku kiren kuasa Ku di kuu, Aku mbŭh tandah kuu udip isa Adŭn Ku dog puan di ndi ong ong.

¹⁷Pak kuu gibabŭ gŭh dŭh tigŭgŭs ka dŭh raan piruah daya Ku.

¹⁸Munti andu, andu sipagi Aku re ndai ujen batuh, anŭ inŭh adi bŭn daya Egypt kinyam so jah.

¹⁹Madin nggen ukum bada sopŭrŭg dāng ngga tadŭ tadŭ-i adi bŭkŭn adi agi di sapa dog pibŭrŭt ka darŭm kandang. Ujen batuh re rabu nyatŭk daya ngga dāng adi babŭ di sapa, ka sopŭrŭg-i re kabŭs.’ ”

²⁰Agi kada so bara pinurung raja mbŭh taru sabab kayuh adi TUHAN mbŭh nang, ka ngara taban ngga mŭrŭt bara urun ngara samŭn dāng dāng ngara, isa sopŭrŭg-i siramat.

²¹Adi bŭkŭn adi dŭh mbit piduri di pinyibakan TUHAN tandah bara urun ka dāng ngara di sapa.

²²Komŭnŭ TUHAN nang di Moses, “Pakat tangan mu ka rangit ka ujen batuh re rabu di ndi tarun tana Egypt ka nyatŭk bara daya, dāng dāng, samŭn kayuh kayuh adi timbu di sapa tarun.”

²³Jadi Moses pakat sikud-i tiju rangit, ka TUHAN pait dudū ngga ujen batuh; ka kijat gŭh nimbak tana. TUHAN pait

²⁴ ujen batuh adi raru bangat ka kijat adi prikirab digiti diginŭ. Anŭ inŭh ujen batuh adi raru bisā adi rais Egypt gi-muran kinyam so jah.

²⁵Di ndi tarun tana Egypt ujen batuh pirusak sopŭrŭg kayuh adi timbu di sapa tarun samŭn sopŭrŭg daya ngga sopŭrŭg dāng. Ayŭh pirusak sopŭrŭg anak kayuh di barang ka yŭn-i samŭn dudu tŭngŭn kayuh.

²⁶Gadung tana Goshen adŭ adi yŭn bara daya Israel rŭŭ, adi dŭh dog ujen batuh.

²⁷Raja bagan Moses ngga Aaron ka nang, “Kari ati aku mbŭh bidosa; TUHAN inŭh adi batur, ka daya daya ku samŭn adŭp ku inŭh adi sarah.

²⁸Bidua ka Tapa! Kieh mbŭh sadang jera da dudū ngga ujen batuh! Aku bijanji an bada angān ruah, ka angān dŭhsah tia rŭŭ digiti.”

²⁹Moses nang di raja, “Darŭm aku mbŭh ruah so kupo, aku re pakat tangan ku bidua ka TUHAN. Dudū re ko, ka ujen batuh re saya, isa kaam puan nang ong ati taŭn TUHAN dapu.

³⁰Pak aku puan nang kaam ngga bara pinurung mai gibabŭ dŭh taru TUHAN Tapa.”

³¹Tŭngŭn flex ngga tŭngŭn jeri mbŭh abo muba ka riyŭk, sabab jeri mbŭh masak, ka flex gibabŭ musu.

³²Pak gandom dŭh rusak amai sundis masak.

³³Moses bu so yŭn raja, ruah so kupo, ka pakat tangan-i buang bidua ka TUHAN. Rasu dudū ngga ujen batuh rŭŭ.

³⁴Kan raja kiris kayuh adi mbŭh jadi, ayŭh bidosa dinge. Ayŭh ngga bara pinurung-i baking dinge mun adi mbŭh

³⁵ka, sak adi ko TUHAN diŭ kidaan so baba Moses, raja dŭh raan bada bara daya Israel ruah.