Read Biatah Bidayuh JOB 11 Bible Online

JOB 11 - Biatah Bidayuh bible

JOB 11

¹Mating kah daya re nam sopŭrŭg pinganang au-tarun anŭ? Bisa kah piminyu bagŭ kiren nŭŭh dŭh sarah?

³Job, kuu pikir kieh re dŭh nam kuu kah? ka pinganang nyirimbe mu re dŭh dog nam kah?

⁴Kuu nang adŭp mu minyu kayuh adi sawŭ; kuu nang adŭp mu bisig di batŭh Tapa.

⁵Kasi ka Tapa nam kuu!

⁶Ayŭh bisa kidaan di kuu rusia pikir kira-I; agi kayuh adi raru tŭrŭp so pinyipuan manusia. Tapa inŭh ngukum kuu kurang so adi kuu patut kinyam.

⁷Dapŭd kah kuu mirati kayuh adi tŭrŭp pasar Tapa?

⁸Pinyibijak Tapa inŭh bās dŭ so rangit adi bigatung, mating aran mu re tungang mirati-i. Tapa puan ong daya adi mbŭh kabŭs, pak kuu dŭh puan-i.

⁹Bās Tapa inŭh bayah so ong, bayah so rawŭt.

¹⁰Kambŭi Tapa nakap ka taban kuu ngga bisara, asi re bitan Ayŭh?

¹¹Tapa puan aki ndi daya adi dŭh biguna; Ayŭh kiris sopŭrŭg pingandai arap ngara.

¹²Daya adi budo re piguru jadi bijak kan kaldi tarun re dog biranak rimon.

¹³Bada bisig atin mu, Job. Pakat tangan mu bidua ka Tapa.

¹⁴Taran kayuh adi arap ngga adi sarah so ramin arŭn mu.

¹⁵Komŭnŭ kuu re pakat jawin mu dŭh ngga mangŭh; kuu re mijog tagap buang birani.

¹⁶Komŭnŭ sopŭrŭg pinyusah mu re miyap so pikir mu, mun uba adi surud ka dog kambŭt.

¹⁷Pimudip mu re jawa dŭ so sekar jawa di yun andu, ka tika karŭm pimudip re nyekar mun pinusak jawa andu.

¹⁸Kuu re udip siramat ka puno ngga pingarap; Tapa re grindung kuu ka bada kuu rŭŭ darŭm damai.

¹⁹Kuu dŭh re taru pinganyu mu; bagŭ daya re mite turung so kuu.

²⁰Pak daya adi ginaka re dŭh mirati ani adi mbŭh jadi di ngara. Ngara dŭh puan kamaki ngara re bisukan. Mating pingarap yŭn daya adi mun anŭ, adŭ-i kabŭs.