Read Biatah Bidayuh JOB 13 Bible Online

JOB 13 - Biatah Bidayuh bible

JOB 13

¹Sopŭrŭg kayuh adi angān nang, muko aku dingah dawŭ-i. Aku mirati sopŭrŭg-i. Aku bagŭ gŭh kayuh puan ku. Aku dŭh kurang so angān.

³Pak kaii ku inŭh ngga Tapa, dŭh ngga angān; aku raan minyu ngga Ayŭh ka kiren di Ayŭh adŭp ku dŭh biyŭn sarah.

⁴Angān kadong aku ngga nutu adŭp ngan dŭh puan ani ani; angān keya ka Doktor adi dŭh tungang pibua daya.

⁵Dŭhsah nang ani ani, ka daya re nang angān bijak!

⁶Dingah aku darŭm aku kidaan pinyusah ku.

⁷Mani angān kadong? Angān pikir Tapa re trima pinganang kadong ngan kah?

⁸Angān suba an nyibandar Ayŭh kah? Angān an ndai kana di Tapa, ka nyibandar har-I kah?

⁹Kambŭi Tapa nakit tingga angān, ani pinyikana ngan re-I dapŭd? Angān pikir angān dapŭd nipu Tapa mun angān nipu daya bŭkŭn kah?

¹⁰Sunggu angān sukan atin bidikok ngan Ayŭh babŭ gŭh kiris ka re ngukum angān.

¹¹ka kuasa-I re bada angān taru.

¹²Pinganang pitas ngan inŭh au-tarun keya ka apŭk; pinganang ngan adi ngga angān nyibandar adŭp ngan inŭh keya ka tana-riyat adi udah pape.

¹³Pirŭŭ adŭp ngan ka nggen di aku pluang ngga minyu, aku dŭh piduri ani re jadi di aku.

¹⁴Aku[24] mbŭh sidia an ruban asŭng.

¹⁵Aku mbŭh dŭh biyŭn pingarap, munki meh kambŭi Tapa siŭ aku? Aku re kiren adŭp ku dŭh sarah di sirung jawin-I.

¹⁶Kadŭ-i pinyibirani ku re nyiramat aku, amai mating daya ginaka re birani situra jawin ngga Tapa.

¹⁷Madin dingah nakit pinganang ku, aku kidaan rati-i.

¹⁸Aku mbŭh sidia re nyibandar adŭp ku, sabab aku puan adŭp ku batur.

¹⁹Kaam re nyarah aku kah, Tapa? Kambŭi Kaam re ndai simŭnŭ, aku mbŭh sidia an bada adŭp ku pajam ka kabŭs.

²⁰Bada aku mite duwŭh masam kayuh; kambŭi Kaam situju, ka aku dŭh re suba sukan adŭp ku so Kaam;

²¹dŭh tia ngukum aku, ka dŭhnyah bada atin taru ku di Kaam pijera aku.

²²Minyu diŭ, O Tapa, ka aku re nam. Puan kah aku minyu, ka Kaam nam aku.

²³Ani dosa ku ka ani sarah ku? Kidaan di aku munki aku sarah.

²⁴Mani Kaam mangān aku? Mani Kaam simuti ngga aku keya ka aku ati pinganyu?

²⁵Kaam suba an pirawan aku? Aku ati au-tarun ka dawŭn adŭ; Kaam nyerang aku adi keya ka ndi sirah siriyang.

²⁶Kaam nyarah aku ngga pinganang pa'it, ndŭg ka pasar kayuh adi aku mbŭh ndai darŭm aku gi-sŭ.

²⁷ Kaam muak kaja ku ngga parik basi; Kaam pirati sakong ku, ka piruh inyŭk kaja ku.

²⁸Sabab anŭ, aku rubuh mun apŭg kayuh adi madam, mun jipo adi dog man gŭgŭt.