Read Biatah Bidayuh JOB 14 Bible Online

JOB 14 - Biatah Bidayuh bible

JOB 14

¹Ata dog biranak ramah ka dŭh bigaya. Sopŭrŭg kinyam pimudip purok ka adi susah.

²Ata timbu ka rayu mun bunga; ata miyap mun singangi.

³An kah Kaam piji ka tingga aku, Tapa, puan kah taban aku ka yŭn bisara, yŭn Kaam tingga arap kana ku?

⁴Mating kayuh bisig bisa mandŭg so tadŭ kayuh kais mun manusia.

⁵Umbur manusia Kaam natu; kiang buran-i mbŭh Kaam miratak. Kaam mbŭh natu-i, ka-i dŭh dapŭd dog ngubah.

⁶Tingga adŭ ngara ka dŭhnyah mito ngara;[25] siŭn ngara dapŭd ngamas kraja di andu anŭ ngga atin sanang.

⁷Agi pingarap yŭn tŭngŭn kayuh adi muko dog tabŭng; ayŭh bisa pari udip ka bikanjak.

⁸Sunggu uat-i mbŭh tanŭ ka minyamba, ka tŭŭd-i kabŭs darŭm tana,

⁹ngga piin ayŭh re timbu dinge.

¹⁰Pak manusia kabŭs, ka anŭ inŭh pinŭbŭn ngara; kamaki ngara kan mbŭh tingge ong?

¹¹Mun sungi adi dŭh tia aman, ka danu adi mbŭh badŭh,

¹²manusia kabŭs, dŭh re pari udip. Ngara manŭn dŭh re burah sitadŭn rangit babŭ agi; ngara manŭn dŭh re burah so bŭŭs ngara.

¹³Kasi ka Kaam sukan aku darŭm ong daya adi mbŭh kabŭs; bada aku dog sukan ndŭg ka Kaam muko baji, komŭnŭ natu jam adi ngga Kaam ingat aku.

¹⁴Kambŭi manusia kabŭs, dapŭd kah ngara pari udip? Pak aku re adu adu kajŭn, kajŭn ndŭg tika pinyusah ati mbŭh ripuan.

¹⁵Komŭnŭ Kaam re bagan, ka aku re nam, ka Kaam re munos asŭng di aku, adi mbŭh Kaam napa.

¹⁶Komŭnŭ Kaam re pirati barang sakong ku, pak Kaam dŭh re nudug dosa ku.

¹⁷Kaam re apun ka pijo dosa ku; Kaam re ngutos sopŭrŭg sarah adi aku mbŭh ndai.

¹⁸Agi tika-i darŭd rubuh ka jenjang re trigen so yŭn-i.

¹⁹Piin re piruruh batuh, ka ujen bangat re musor tana; ka simŭnŭ gŭh Kaam pirusak pingarap manusia adi ngga-i udip.

²⁰Kaam ngarah manusia ka taran ngara bada adu adu mating; kan ngara kabŭs, jawin ngara birubah.

²¹Anak anak ngara jadi daya adi dog stabi, pak ngara dŭh puan, dŭh gŭh ngara puan sinde ngara dog pimangŭh.

²²Ngara kinyam andam darŭm pŭrŭng ngara adŭ ka pinyusah adi darŭm atin ngara.