Read Biatah Bidayuh JOB 16 Bible Online

JOB 16 - Biatah Bidayuh bible

JOB 16

¹Muko aku dingah pinganang adi sakanŭ dawŭ-i; pinganang saduh adi angān nggen kaŭs-i pijera aku.

³Angān re adu adu minyu kah? Ani anŭ di atin ngan adi bada angān adu adu minyu?

⁴Kambŭi angān aku, ka aku angān, aku bisa nang sopŭrŭg anŭ adi angān mbŭh nang. Aku bisa minyu bijak rawan angān ka pirŭnggŭd angān ngga dudu buwa pinganang.

⁵Aku bisa nagap angān ngga pinyitayan ka adu adu minyu ngga nyaduh angān.

⁶Pak kambŭi aku minyu, mating guna-i, ka kambŭi aku pirŭŭ adŭp ku, andam ku babŭ.

⁷Kaam mbŭh piramah aku, Tapa; Kaam mbŭh bada rawang ku dog siŭ.

⁸Kaam mbŭh muak aku; Kaam pinganyu ku. Aku mbŭh dŭm turang ngga kurit, ka daya nang anŭ mbŭh tandā aku sawŭ sarah.[31]

⁹Darŭm baji-I Tapa nyiratak aku; Ayŭh nyitŭrŭng aku ngga tiru.

¹⁰Keya ka dāng mangah ngara bitanyeng kiren jipŭh tingga aku; ngara kirurung aku ka napar jawin ku.

¹¹Tapa mbŭh nggen aku ka darŭm tangan daya arap.

¹²Dawŭ-i aku udip bamai, pak Tapa nakap aku di tungo ku mukong aku ka sagan aku. Ayŭh pari pari mukong aku

¹³ka nimbak aku ngga reja-panah so barang parad. Reja panah-I tabŭk aku ka bada aku biragan; taŭn dŭh adŭ Ayŭh biyŭn masi.

¹⁴Ayŭh adu adu bada aku biragan; Ayŭh nyerang mun soldadu adi triyŭn.

¹⁵Aku sien ka nēn piraka adi dog ndai so banang guni, ka aku guru digiti di tana, arah.

¹⁶Aku mbŭh sien ndŭg ka jawin ku bireh, ka pundu batŭh ku mbŭh bŭ buang barŭm,

¹⁷pak aku bŭn ndai pingandai ganas, ka dua ku ka Tapa inŭh ngga atin batur.

¹⁸O Tana, dŭhnyah sukan sarah adi mbŭh dog ndai di tunduh aku! Dŭhnyah bada sien ku mite pinyitŭnggŭn dog pimanu dog pirŭŭ!

¹⁹ Agi daya di shorga adi re nggen taksi nang aku dŭh sarah.

²⁰Bara jerā ku kinarap aku; aku sien di sirung jawin Tapa.

²¹Aku raan daya minyu ngga Tapa yŭn ku, adi keya ka minyu yŭn dingan-i.

²²Sawa umbur ku mbŭh dŭh tia bagŭ, ka aku re kabŭs ka re mating.