Read Biatah Bidayuh JOB 27 Bible Online

JOB 27 - Biatah Bidayuh bible

JOB 27

¹Aku bipayu pakai adŭn Tapa Bisa-pŭrŭg adi udip, adi abah mbit bat di hak ku ka adi bada pimudip ku sangsara;

³siragi-i Tapa nggen asŭng di aku,

⁴baba ku dŭh re nang kayuh arap, jura ku dŭh re kadong.

⁵Aku dŭh re nang angān batur; ndŭg ka aku kabŭs aku re nang adŭp ku dŭh sarah.

⁶Aku dŭh re ko nang adŭp ku batur; pikir-kira atin ku dŭh nyarah aku.

⁷Isa-i daya adi nyakar aku ka adi rawan aku dog ukum mun daya adi ginaka ngga adi dŭh tŭnggŭn dog ukum.

⁸Ani pingarap daya adi dŭh taru Tapa kan Tapa tambit asŭng ngara?

⁹Kan pinyusah mandŭg, re Tapa dingah kah sien ngara mite turung?

¹⁰Sipatut-i ngara gruwŭn pinyigaŭn adi Ayŭh nggen; sipatut-i ngara adu adu bidua ka Ayŭh.

¹¹Isa-i aku ngajar angān munki masam bās kuasa Tapa, ka kidaan rati kayuh adi Tapa Bisa-pŭrŭg mbŭh ngatur.

¹²Angān mbŭh kiris sopŭrŭg kayuh anŭ ngga batuh adŭp ngan; ka mani meh angān minyu nang kayuh au-tarun?

¹³[52]Simuti inŭh Tapa Bisa-pŭrŭg ngukum daya ginaka, daya adi ganas.

¹⁴Ngara bisa biyŭn bagŭ anak, pak sopŭrŭg re dog siŭ darŭm perang; anak anak ngara re bŭn biyŭn sukup pinguman.

¹⁵Ngara adi babŭ udip re kabŭs bada andam, ka uban ngara re dŭh muās ngara.

¹⁶Daya ginaka re biyŭn raru bagŭ pirak an ngara mirang ka biyŭn rabis bagŭ piraka so tung daya bŭkŭn;

¹⁷pak daya adi kana re pakai-i, ka daya jujur re tambit pirak anŭ.

¹⁸Daya ginaka pijog ramin mun sarin taka[53] puan kah mun bari urun adi jaga ŭmŭh.

¹⁹Pinŭbŭn-i[54] ngara re guring mun daya kaya, ka kan ngara burah, ngara re dapŭd pinyikaya ngara miyap.

²⁰Keya ka uba adi nyirŭgŭh mandŭg, pinyirusag nyatŭk ngara; sabak singarŭm re poh ngara;

²¹sabak timor re dimbut ngara so ramin ngara;

²²sabak poh ngara ngga dŭh kira masi darŭm ngara suba bu mangān kuasa-i.

²³Sabak poh murah ngara keya ka daya nyirimbe ngara, kamaki maki ngara panu ngara dog pimangŭh.