Read Biatah Bidayuh JOB 28 Bible Online

JOB 28 - Biatah Bidayuh bible

JOB 28

¹[55] Agi tarun yŭn pirak dog kareh; agi tarun yŭn mas dog pibisig.

²Basi dog kareh so tana ka batuh dog badang ngga piruah timaga.

³Ngara mŭrŭt tarun yŭn adi siabo karŭm. Ngara tambus rasan tana ka kareh jiroh batuh darŭm karŭm patŭ'.

⁴Jo so yŭn pinyirŭŭ daya di tarun yŭn adi bŭn daya kadŭg, ngara kareh rubang yŭn ngara mŭrŭt. Diginŭ ngara nyiraja sadi adŭp ngara, bidigŭng di taris darŭm rubang.

⁵Tana piruah pinguman, pak di ribo tana anŭ sopŭrŭg kayuh adi pape ka adi randŭk.

⁶Batuh tana agi nilam dieh, ka dabu tana agi mas dieh.

⁷Mating beuh kiris aran di ka rubang anŭ, ka mating manuk volcha mikabur di tunduh-i.

⁸Mating singah puan kah dāng adi mangah panu di aran adi maput anŭ.

⁹Ngara kareh batuh adi siabo riang, dimbut darŭd di uras-i.

¹⁰Darŭm ngara mŭrŭt tambus darŭd batuh, ngara dapŭd batuh batuh brega.

¹¹Ngara kareh ndŭg atak[56] sungi ka bada tatŭng kayuh adi dog sukan.

¹²Pak diki pinyibijak bisa dog dapŭd? Diki meh ata bisa birajar yŭn dapŭd mirati-i?

¹³Pinyibijak dŭh bisa dog dapŭd di dupan manusia; mating daya puan guna-i.

¹⁴Pinyitŭrŭp rawŭt ngga rawŭt bās nang pinyibijak mating di rasan adŭp-i.

¹⁵Pinyibijak dŭh dapŭd dog miris ngga pirak ka mas.

¹⁶Mas ngga batuh batuh brega dŭh dapŭd brinyam ngga pinyibijak.

¹⁷Pinyibijak brega dŭ so mas, brega dŭ so gabuk mas puan kah saker kristal.

¹⁸Pinyibijak brega dŭ so batuh karang, so kristal, ka so mutiara.

¹⁹Batuh topaz ngga tigŭrŭ mas dŭh dapŭd danding rega pinyibijak.

²⁰Diki, meh, atak pinyibijak? Diki meh ata bisa birajar yŭn dapŭd mirati-i?

²¹Mating kayuh adi ngasŭng dapŭd kiris-i, dŭh gŭh manuk adi mikabur.

²²Pinyikabŭs ngga pinyirusag nang adŭp-i dingah kaŭs agah-i adŭ.

²³Tapa sadi adŭ puan aran-i, puan tarun yŭn dapŭd pinyibijak,

²⁴Sabab Ayŭh kiris pinŭbŭn ong, kiris sopŭrŭg kayuh di ribo rangit.

²⁵Kan Tapa nggen pinyibake di sabak ka natu pinyibayah rawŭt;

²⁶kan Tapa natu diki ujen rabu, ka aran adi abun-dudū so;

²⁷nganŭ Ayŭh kiris pinyibijak ka suba-i; Ayŭh nyibandar-i.

²⁸ Tapa nang di manusia, “An bijak, angān dŭh siŭn dŭh stabi di TUHAN. An mirati, angān dŭh siŭn dŭh taran kayuh arap.”