Read Biatah Bidayuh JOB 29 Bible Online

JOB 29 - Biatah Bidayuh bible

JOB 29

¹Job piguru minyu dinge.

²Munki kambŭi pimudip ku pari mun amba-i di andu Tapa grindung aku.

³Nganŭ Tapa ari agi ngga aku ka nggen di aku jawa darŭm aku panu darŭm karŭm.

⁴Anŭ inŭh tipuh adi ngga pimudip ku mujur, tipuh adi ngga Tapa jadi jerā ku ka grindung ramin ku.

⁵Di tipuh anŭ Tapa Bisa-pŭrŭg agi ngga aku, ka aku dog kirurung sopŭrŭg anak ku.

⁶Sapi ngga kambing ku piruah bagŭ sisuh, ka tŭngŭn tŭngŭn kanā ku timbu sunggu tana-i pibatuh.

⁷Kan bara pingubak kupo tikuruk ka aku agi sua guru ngga ngara,

⁸bara dari adi mara nggen aran di aku kan ngara kiris aku, ka bara nyamba mijog nggen stabi di aku.

⁹Bara pinguru rayat pajam;

¹⁰ndŭg ka daya adi raru dog biguna pajam gŭh.

¹¹Barang naan daya adi kiris aku bait dingah aku biyŭn kayuh kana an-i nang pasar kayuh adi mbŭh ku ndai.

¹²Kan daya sirata bagan mite turung, aku turung ngara; aku turung anak tumang adi dŭh biyŭn daya yŭn-i nyigura.

¹³Ngara adi raru susah nganju aku, ka aku turung dayung uban dapŭd pinyigrindung.

¹⁴Aku ari mandis buang tŭnggŭn.

¹⁵Aku inŭh batŭh yŭn daya adi karak, ka kaja yŭn daya adi bajang.

¹⁶Aku keya ka sama di daya sirata ka pingibān yŭn daya saruh adi dog har.

¹⁷Aku nyirubuh kuasa daya adi gaok ka daya adi ngara pijera aku pirupas so tangan ngara.

¹⁸Aku ari harap umbur ku ambu ka kabŭs di arŭn ngga sanang.

¹⁹Aku keya ka tŭngŭn kayuh adi ari agi piin yŭn uat-i ka adi ari bisa bada sipot-abun daan-i.

²⁰Barang naan daya ari muji aku, ka pinyibake ku bŭn re kurang.

²¹Kan aku nggen pinyitayan, daya pajam ka nakit dingah kayuh adi aku nang;

²²mating kayuh re ngara nang tia kan aku ko minyu. Pinganang ku duduh dog ngara;

²³barang naan trima pinganang ku anŭ mun tukang teya trima ujen di tipuh bunga.

²⁴Aku sanyum kan ngara manyap pingarap; jawin ku adi gaŭn ngatat ngara.

²⁵Aku jadi pinguru ka tukang matŭd itong; aku nguru ngara nimun raja nguru bara soldadu-i, ka nyaduh ngara di tika ngara susah.