Read Biatah Bidayuh JOB 30 Bible Online

JOB 30 - Biatah Bidayuh bible

JOB 30

¹Pak daya adi mara so aku pimangŭh aku! Sama ngara, dawŭ-i dŭh biguna, ndŭg ka aku abah bada ngara turung kasong ku jaga biri.

²Ngara inŭh tibaran daya adi dŭh biguna, raru ramah re nyiraja yŭn ku.

³Ngara raru sirata buang sibŭrŭk ndŭg ka uat adi badŭh an gŭh ngara man, di tarun adi pajam.

⁴Ngara dimbut anak anak kayuh-udip di tarun tana-pajam ka man-i, samŭn uat uat kayuh adi dŭh biyŭn sap!

⁵Sopŭrŭg daya kasig ngara ngga sirais, keya ka nyirais tawa pinaku.

⁶Ngara mbŭh dŭh siŭn dŭh rŭŭ darŭm tāng, darŭm rubang adi dog kareh di bŭngŭn jenjang.

⁷Di tuān ngara nyidaong mun dudu dāng ka bidakŭp ngga dingan-i di ribo randa kayuh.

⁸Tibaran daya adi taŭn mbŭh dŭh adŭ biguna! Ngara dog kasig so rais ati.

⁹Madin ngara mandŭg ka tawŭh aku; aku ati au-tarun ka kayuh tapat yŭn ngara.

¹⁰Ngara tiru buang sidot di aku; ngara pikir adŭp-i mbŭh rabis kana so aku, ndŭg ka mandŭg ka nyiruja jawin ku.

¹¹Sabab Tapa mbŭh bada aku ramah buang dŭh bigaya, ngara nyerang aku ngga siabo atin baji ngara.

¹²Ndi tibaran anŭ nyurong nyerang aku; rabu sigawang aku dog tawa ngara.

¹³Ngara nŭpŭt aku ka bada aku rabu; ka mating daya kinarang[57] ngara.

¹⁴Ngara mape kuta ku ka sopŭrŭg ngara mŭrŭt ka nyurong aku.

¹⁵Aku mbŭh raru taru; dŭn kana ku mbŭh miyap mun abus sabak, ka udip mujur ku mbŭh miyap mun abun.

¹⁶Madin aku mbŭh sindŭk re kabŭs; tipuh sangsara mbŭh kirurung aku.

¹⁷Singarŭm turang ku mandam; andam adi man aku taŭn mbŭh dŭh adŭ rŭŭ.

¹⁸Tapa nakap aku di tungo jipo ku ka nyiriyŭk piraka ku.

¹⁹Ayŭh taran aku di tawang; aku mbŭh keya ka kayuh kais.

²⁰Aku bagan Kaam, O Tapa, pak Kaam bŭn nam; ka kan aku bidua, Kaam dŭh piduri.

²¹Kaam gaok ngga aku; Kaam kisiis aku ngga sopŭrŭg kuasa Mai.

²²Kaam tandah sabak poh taban aku bu; ka sabak ribut poh aku kamati kamanŭ.

²³Aku puan Kaam taban aku ka yŭn pinyikabŭs, tarun yŭn daya adi udip ngga kabŭs bidapŭd.

²⁴Mani Kaam nyerang daya adi mbŭh rubuh, adi dŭh bigaya adŭ-i mite masi?[58]

²⁵Dŭh kah aku muās ngga daya adi susah ka masi di ngara adi sirata?

²⁶Aku harap di pinyanang ngga jawa, pak gŭt-i pinyusah ngga karŭm mandŭg.

²⁷Aku mbŭh asur sabab susah buang mandam; barang andu aku mbŭh sangsara.

²⁸Udip ku mbŭh karŭm, dŭh biyŭn sekar jawa; aku mijog di sirung jawin daya bagŭ mite turung.

²⁹Sirŭŭn ku sak sirŭŭn daya susah ka maput keya ka sidaong kasong tarun puan kah jawŭn manuk onta.

³⁰Kurit ku mbŭh marui singŭt; ganan ku mbŭh paras ngga sungoh.

³¹Tarun yŭn adi ko aku yŭn dingah jawŭn gaŭn musik, madin mbŭh yŭn aku dingah kaŭs-i puās ngga sien.