Read Biatah Bidayuh JOB 31 Bible Online

JOB 31 - Biatah Bidayuh bible

JOB 31

¹Aku mbŭh bipayu ka bijanji dŭh re tingga dayung.

²Ani ndai Tapa Bisa-pŭrŭg di ata? Munki Ayŭh maras pingandai manusia?

³Ayŭh pait pinyirusag ngga pinyirubuh di ngara adi ndai sarah.

⁴Tapa puan sopŭrŭg kayuh adi ndai ku; Ayŭh kiris barang sakong ku.

⁵Aku bipayu aku bŭn arap ka bŭn suba nipu daya.

⁶Isa Tapa nimbang aku ngga timbang adi batur, ka Ayŭh re kiris munki masam aku dŭh sarah.

⁷Kambŭi aku agi miriseu so aran adi batur puan kah tandah adŭp ku ripong di kayuh arap, kambŭi tangan ku kais bada dosa,

⁸bada meh pimuruh ku dog pirusak, puan kah bada daya bŭkŭn man pinguman adi aku purun.

⁹Kambŭi aku agi ripong di sawŭn dingan ku, ka kajŭn, bisukan, di sapa tiban-i,

¹⁰bada meh sawŭn adŭp ku tanŭk pinguman yŭn dari bŭkŭn ka bŭŭs di ambok dari bŭkŭn.

¹¹Arap adi mun anŭ patut dog maras ngga pinyikabŭs.

¹²Anŭ re keya ka apui bisā neraka, man sopŭrŭg kayuh adi aku dapu.

¹³Kan tadŭ so urun ku mingungut rawan aku, aku dingah ayŭh ngadu ka nakit ngga ayŭh.

¹⁴Kambŭi dŭh, simuki meh aku re situra jawin ngga Tapa? Ani re ku nang kan Tapa mandŭg di bisara aku?

¹⁵Tapa adi napa aku inŭh Tapa adi napa urun ku.

¹⁶Aku bŭn abah turung daya adi sirata; bŭn aku tandah dayung uban asa

¹⁷puan kah tandah anak tumang sikirau darŭm aku biyŭn sukup pinguman.

¹⁸Tian-ti aku udip aku sita ngara.[59]

¹⁹Kan aku dapŭd daya sirata, adi raru sirata ndŭg ka dŭh tungang miris piraka-i,

²⁰aku nggen di ayŭh piraka adi dog ndai so buruh biri, adi so kaban biri adŭp ku. Komŭnŭ ayŭh re muji aku ngga siabo atin-i.

²¹Kambŭi aku mbŭh nipu anak tumang, amai puan adŭp ku re manang di yŭn bisara,

²²isa-i tangan ku dog mata; isa-i dog dimbut so kawin ku.

²³Sabab aku taru ukum Tapa, aku dŭh birani ndai kayuh adi mun anŭ.

²⁴Aku bŭn bisangan di buat-rata

²⁵puan kah mingangŭn di pinyikaya ku.

²⁶Aku bŭn nyambah batŭh andu adi nyekar jawa puan kah buran adi ramus.

²⁷Aku bŭn ripong di sopŭrŭg-i ka bŭn sium tangan adŭp ku ngga stabi di sopŭrŭg-i.

²⁸Dosa adi mun anŭ patut dog ngukum ngga pinyikabŭs, amai anŭ nyibireu Tapa Bisa-pŭrŭg.

²⁹Aku bŭn gaŭn kan pinganyu ku sangsara, puan kah munos asŭng kan ngara dog nyatŭk pinyirusag;

³⁰aku bŭn bidosa, anŭ inŭh bidua mite ngara kabŭs.

³¹Sopŭrŭg ngara adi nyiraja yŭn ku puan nang aku ari kambat daya saruh di ramin ku.

³²Aku bada mŭrŭt ramin ku daya adi bigandon ka bŭn tandah ngara bŭŭs di aran passar.

³³Daya bŭkŭn suba sukan dosa ngara, pak aku bŭn sukan jaku.

³⁴Aku bŭn taru kayuh adi daya an nang; aku bŭn pirŭŭ adŭp ku puan kah rŭŭ darŭm arŭn amai taru dog kinarap daya.

³⁵Abah kah daya dingah kayuh nang ku? Aku bipayu barang bang piminyu ku inŭh batur. Isa Tapa Bisa-pŭrŭg nam aku. Kambŭi pinganang adi ngga pinganyu ku nyarah aku dog nuris isa aku dapŭd kiris-i,

³⁶aku bisa nēn-i di kawin ku ka na-i di ubak ku ndu makota.

³⁷Aku an kidaan di Tapa sopŭrŭg kayuh adi aku mbŭh ndai, ka mijog migaŭng di sirung jawin-I.

³⁸Kambŭi tana adi aku majak tana adi aku tambit so daya adi dapu-i,

³⁹Kambŭi aku man pinguman adi dog purun diginŭ pak bara tukang teya adi purun-i sikirau,

⁴⁰isa-i gandom ngga jeri adi dog purun diginŭ, dog gati ngga uduh ka tŭngŭn reja. Ndŭg ti adŭ pinganang Job.