Read Biatah Bidayuh JOB 32 Bible Online

JOB 32 - Biatah Bidayuh bible

JOB 32

¹Sabab Job mbŭh bandar sabah adŭp-i dŭh sarah, ngara adi taruh naan ko adŭ nam ayŭh.

²Pak ndi naan daya adi agi mijog diginŭ dŭn Elihu mbŭh dŭh tan nyijŭn atin baji-i, sabab Job nyibandar adŭp-i ka nyarah Tapa. (Elihu inŭh anak Barakel, sesang Buz, so manak Ram.)

³Ayŭh tuas gŭh di jerā Job adi taruh naan anŭ. Ngara dŭh tungang nam Job, ka anŭ bada Tapa mun adi sarah.

⁴Sabab Elihu adi siabo mara diginŭ, ayŭh kajŭn ndŭg sopŭrŭg daya muko minyu.

⁵Kan ayŭh kiris ngara adi taruh dŭh tungang nam Job, ayŭh baji

⁶ka piguru minyu. Aku mara, ka angān minyamba, jadi aku taru kidaan di angān kayuh adi aku pikir.

⁷Aku nang darŭm asŭng ku angān patut minyu, nang angān adi tuuh patut kutung pinyibijak ngan.

⁸Pak roh Tapa Bisa-pŭrŭg inŭh adi mandŭg ka manusia ka nggen di ngara pinyibijak.

⁹Dŭh-i pinyituuh adi bada daya bijak puan kah turung daya puan kayuh adi batur.

¹⁰Jadi madin aku raan angān dingah aku; bada aku kidaan di angān kayuh adi aku pikir.

¹¹Aku dingah ngga sabar darŭm angān minyu ka kajŭn sitadŭn angān jiroh pinganang bijak.

¹²Aku nakit dingah ka kiris angān arah; pinganang Job adi sarah angān dŭh tungang nang sarah.

¹³Simuki meh angān nang adŭp ngan mbŭh dapŭd pinyibijak? Tapa dŭh siŭn dŭh nam Job, amai angān dŭh dapŭd.

¹⁴Job minyu ngga angān, dŭh ngga aku, pak aku dŭh re nam ayŭh mun angān nam ayŭh.

¹⁵Buwa pinganang bada ngara dŭh dapŭd nang ani ani, Job; ngara dŭh dapŭd nam kuu.

¹⁶Bisa kah aku adu adu kajŭn darŭm ngara mbŭh pajam? Ngara mijog diginŭ ngga dŭh biyŭn ani ani re nang.

¹⁷Dŭh, aku re nggen pinyinam adŭp ku ka kidaan di kuu kayuh adi aku pikir.

¹⁸Aku dŭh dapŭd kajŭn tia. Aku dŭh dapŭd bitan pinganang ku.

¹⁹Kambŭi aku dŭh dapŭd minyu, aku re rutop mun bŭrŭh-kurit adi puno ngga wain adi bauh.

²⁰Aku dŭh tan; aku an minyu.

²¹Aku dŭh re marad ngga asi asi; aku dŭh re muji asi asi.

²²Aku dŭh pandai muji daya, ka Tapa re rikas ngukum aku kambŭi aku ndai simŭnŭ.