Read Biatah Bidayuh JOB 33 Bible Online

JOB 33 - Biatah Bidayuh bible

JOB 33

¹Ka madin, Job, nakit dingah sopŭrŭg kayuh adi aku nang.

²Aku mbŭh sidia an nang kayuh adi agi di pikir ku.

³Sopŭrŭg buwa pinganang ku mandŭg so atin ku adi batur, ka aku minyu kayuh adi sawŭ.

⁴Roh Tapa napa aku ka nggen di aku asŭng.

⁵Nam aku kambŭi kuu dapŭd. Sidia karit mu.

⁶Kuu ngga aku brimun di batŭh Tapa, soduwŭh ta dog napa so tana-riyat.

⁷Ngapŭi kuu dŭhsah taru aku puan kah ani re ku ndai.

⁸Ati inŭh kayuh adi aku dingah kuu nang:

⁹“Aku dŭh sarah; mating kayuh sarah ndai ku. Aku bisig ka mating dosa ku.

¹⁰Pak Tapa jiroh aran ngga nyerang aku ka ndai di aku keya ka aku ati pinganyu.

¹¹ Ayŭh mŭŭng parik basi di kaja ku; Ayŭh kiris barang sakong ku.”

¹²Pak aku kidaan di kuu, Job, kuu sarah. Tapa inŭh bās so tadŭ tadŭ manusia.

¹³Mani kuu nyarah Tapa nang Ayŭh bŭn nam kan manusia ngadu?

¹⁴Sunggu Tapa pari pari minyu, daya mating piduri kayuh nang-I.

¹⁵ Singarŭm kan daya bŭŭs, Tapa minyu darŭm pŭmŭh ka ngga kayuh adi tatŭng keya ka darŭm pŭmŭh.

¹⁶Ayŭh bada ngara dingah kayuh adi nang-I, ka ngara taru bada pinyibakan-I.

¹⁷Tapa minyu ngga bada ngara dŭh tia ndai dosa ka ngga nyiramat ngara so jadi gambung.

¹⁸Ayŭh dŭh re bada ngara dog pirabur; Ayŭh nyiramat ngara so adŭp pinyikabŭs.

¹⁹Tapa nyibatur daya pakai andam ka bada pŭrŭng ganan ngara mandam.

²⁰Ngara adi mandam abah man, ndŭg ka pinguman adi siabo sidi tungang bada ngara nguta.

²¹Pŭrŭng ganan ngara jadi raru manyuh; turang ngara abo tatŭng;

²²ngara mbŭh sindŭk re di ka ong daya adi mbŭh kabŭs.

²³Kadŭ-i ndi naan malaikat re turung ngara, ndi so biribu ribu naan malaikat Tapa, adi kidaan bada ata ingat kayuh adi patut ata ndai.

²⁴Ngga masi malaikat re nang, “Pirupas ngara! Ngara dŭh re di ka ong daya adi mbŭh kabŭs. Ati inŭh tubos ngga pirupas ngara.”

²⁵Pŭrŭng ganan ngara re pari mara ka bake dinge;

²⁶kan ngara bidua, Tapa re nam; ngara re nyambah Tapa ngga gaŭn; Tapa re bada kayuh pari batur yŭn ngara.

²⁷Barang naan re nang di sirung jawin daya bagŭ, “Aku mbŭh bidosa. Aku mating ndai kayuh adi batur, pak Tapa apun aku.

²⁸Ayŭh dŭh tandah aku di ka ong daya adi mbŭh kabŭs, ka aku babŭ udip.”

²⁹Tapa pari pari ndai sopŭrŭg ati;

³⁰Ayŭh nyiramat asŭng daya, ka bada ngara udip sanang.

³¹Madin, Job, dingah kayuh adi aku nang; pirŭŭ adŭp mu ka tandah aku minyu.

³²Pak kambŭi kuu biyŭn kayuh an mu nang, bada aku dingah; aku bisa ngaku nang kuu batur.

³³Pak kambŭi dŭh, pirŭŭ adŭp mu ka dingah aku, ka aku re ngajar kuu pinyibijak.