Read Biatah Bidayuh JOB 34 Bible Online

JOB 34 - Biatah Bidayuh bible

JOB 34

¹Sopŭrŭg ngan raru bijak, raru pandai; dingah madin kayuh adi nang ku.

³ Angān puan pinguman sidi kan angān kija-i, ka pinganang bijak kan angān dingah-i.

⁴Kayuh ati adŭp ta an natu sawŭ ngga dŭh.

⁵Job nang adŭp-i dŭh sarah, ka nang Tapa dŭh kana ngga adŭp-i.

⁶Ayŭh nang, “Simuki aku re kadong ka nang adŭp ku sarah? Aku mbŭh binasa, pak aku dŭh sarah.”

⁷Mbŭh kah angān kiris daya mun Job? Ayŭh bŭn stabi di Tapa.

⁸Ayŭh gagā biayo ngga daya arap ka bijerā ngga daya bidosa.

⁹Ayŭh nang mating guna-i nŭŭh tunda pinyiraan Tapa.

¹⁰Dingah aku, angān daya adi mirati! Bisa kah Tapa Bisa-pŭrŭg ndai kayuh adi sarah?

¹¹ Ayŭh ngupah daya yŭn kayuh adi ngara ndai ka ndai di ngara nanyam patut ngara trima.

¹²Tapa Bisa-pŭrŭg dŭh ndai kayuh arap; Ayŭh bŭn re dŭh tŭnggŭn ngga tadŭ daya.

¹³Agi kah Tapa dapŭd kuasa-I so daya bŭkŭn? Agi kah daya tijuan Ayŭh bada nguasa ong?

¹⁴Kambŭi Tapa kadi asŭng manusia,

¹⁵sopŭrŭg daya adi ngasŭng re kabŭs ka pari ka tana.

¹⁶Madin dingah aku, kambŭi kuu bijak.

¹⁷Kuu nyarah pinŭnggŭn Tapa kah? Kuu pikir Ayŭh tiru di pinyitŭnggŭn kah?

¹⁸Tapa nyarah bara raja ngga bara pimritah kan ngara ndai sarah ka ginaka.

¹⁹Ayŭh dŭh marad ka bara pimritah puan kah nyibandar daya kaya so daya sirata, amai Ayŭh napa sopŭrŭg daya.

²⁰Agi daya re tapŭ kabŭs singarŭm. Tapa ngukum daya ka ngara binasa; Ayŭh sanang siŭ daya adi bikuasa ka bake.

²¹Ayŭh kiris barang sakong ta.

²²Mating karŭm re sukup karŭm ngga sukan daya bidosa so Tapa.

²³Tapa dŭhsah ngŭtŭ jam[60] yŭn nggen bisara di manusia.

²⁴Ayŭh dŭhsah pirasa kan-I an kadi bara pinguru ka gati ngara ngga daya bŭkŭn.

²⁵Sabab Ayŭh puan kayuh adi ngara ndai Ayŭh taran ngara ka pirandŭk ngara singarŭm.

²⁶Ayŭh ngukum bara daya bidosa di sirung jawin daya bagŭ,

²⁷sabab ngara mbŭh dŭh tia tunda Ayŭh ka nyibireu sopŭrŭg pinyipesan-I.

²⁸Sitagar ngara daya sirata sien ka Tapa, ka Ayŭh dingah ngara bagan mite turung.

²⁹Kambŭi Tapa natu re dŭh ndai ani ani, mating daya dapŭd ngamun Ayŭh. Kambŭi Ayŭh sukan jawin-I, ata re dŭh bigaya.

³⁰Mating kayuh bisa bangsa ndai ngga kinarang bara adi kinanyuh so nguasa ngara.

³¹Job, muko kuu ngaku dosa mu di Tapa ka bijanji dŭh re tia ndai dosa?

³²Muko kuu mite Tapa kiren sarah mu, muko kuu situju re dŭh tia ndai arap?

³³Amai kuu dŭh situju di pingandai Tapa, dapŭd kah kuu harap Ayŭh ndai kayuh adi kuu raan? Adŭp mu ndai pikir mu, dŭh aku; kidaan di kieh madin ani pikir mu.

³⁴Daya adi mirati taŭn re situju; ka daya bijak adi dingah aku re nang

³⁵Job minyu dŭh ngga atin mirati-i ka mating kayuh adi nang-i biyŭn rati.

³⁶Suba nakit pikir sopŭrŭg kayuh adi Job nang; angān dapŭd kiris ayŭh minyu mun daya arap.

³⁷Ngga nambah dosa-i ayŭh anŭ daya adi an birawan; di jawin sopŭrŭg ta ayŭh napat Tapa ka dŭh ko ko minyu.