Read Biatah Bidayuh JOB 37 Bible Online

JOB 37 - Biatah Bidayuh bible

JOB 37

¹Sabak ribut bada atin ku simadup.

²Dingah, sopŭrŭg ngan, sirŭŭn Tapa, jawŭn dudū adi mandŭg so baba-I.

³Di ndi rangit rangit Ayŭh na kijat, so tŭbŭn ndi ndŭg tŭbŭn andi ong.

⁴Komŭnŭ jawŭn bās sirŭŭn-I dog dingah, jawŭn bās dudū buang kijat mikirab.

⁵So ka pinyibada Tapa kayuh kayuh nginga jadi, kayuh kayuh saruh adi ata dŭh tungang mirati.

⁶Ayŭh pesan salju bada rabu di tunduh ong, ka ujen adi raru bangat so pinyibada-I.

⁷Ayŭh pirŭŭ kraja ta; Ayŭh kiren di ata kayuh adi dapŭd-I ndai.[63]

⁸Dāng tarun mŭrŭt rubang-i.

⁹Sabak ribut mandŭg so siratan, ka sabak adi raru madud mandŭg so utara.

¹⁰Sabak asŭng Tapa bada piin raru madud, ka bada-i jadi piin-maku.

¹¹Kijat mikirab so abun,[64]

¹²darŭm-i panu so ka pinyiraan Tapa. Ngara ndai sopŭrŭg adi Tapa bada, di barang yŭn di ndi ong ong.

¹³Tapa pait ujen bada misa tana; Ayŭh bisa pait-i ngga ngukum ata, puan kah ngga ndai kana di ata.

¹⁴Pajam dawŭ-i, Job, ka dingah; suba kira kayuh bās adi Tapa mbŭh ndai.

¹⁵Puan mu munki Tapa pesan ka bada kijat mikirab so abun?

¹⁶Puan mu munki abun tipuang di rangit, kraja pingandai Tapa adi raru bās-i?

¹⁷Dŭh, kaŭs-i kuu sangsara dog paras kan sabak siratan nyerang tana.

¹⁸Dapŭd kuu turung Tapa mamad rangit ka bada-i riang mun basi adi dog pijarŭh?

¹⁹Ngajar kieh kayuh adi an kieh nang di Tapa; pikir ami mbŭh mapung; mating kayuh re kieh nang.

²⁰Aku dŭh mite adŭp ku minyu ngga Tapa; re ngga mani aku nggen di Ayŭh pluang ngga pirabur aku?

²¹Ka madin jawa di rangit mbŭh raru jawa, bada batŭh ta siu; ka rangit mbŭh bisig dog poh sabak.

²²Sekar adi mun mas agi dog kiris di utara, ka bragah Tapa bada ata taru.

²³Kuasa Tapa inŭh raru bās ndŭg ka ata dŭh dapŭd nyindŭk Ayŭh; Ayŭh tŭnggŭn ka batur darŭm-I ngatur manusia.

²⁴Ngapŭi meh, barang naan manusia taru di Ayŭh, ka Ayŭh gŭh meh nyibireu ngara adi nang adŭp-i bijak.