Read Biatah Bidayuh JOB 38 Bible Online

JOB 38 - Biatah Bidayuh bible

JOB 38

¹Komŭnŭ, so sabak ribut, TUHAN minyu di Job.

²Asi kuu nak birani siken pinyibijak Ku ngga pinganang bawa ka au-tarun?

³Madin sidia adŭp mu situra jawin ngga Aku ka nam pinyiken Ku.

⁴Agi kah kuu diginŭ di andu Aku napa ong? Kambŭi kuu raru pandai, nam Aku.

⁵Asi adi natu bayah ong? Asi adi na taris pingŭkŭd maning-i? Puan mu kah sopŭrŭg pinyinam-i?

⁶Ani bangan tiang tiang adi nukang ong? Asi adi na batuh pinagap ong?

⁷Isan isan andu anŭ, bitang bitang samah nyanyi, ka bara malaikat[65] nyirais ngga gaŭn.

⁸ Asi tŭŭp tiban ka bitan piin rawŭt[66] kan-i bubus so ite ong?

⁹Aku inŭh adi nutu rawŭt ngga abun ka marut-i ngga karŭm.

¹⁰Aku natu baat yŭn rawŭt ka bitan piin-i ngga tiban adi dog ngabŭt ngga parang.

¹¹Aku kidaan dieh, “Ndŭg ti adŭ, ka dŭh re rabis jo so ti! Digiti girumbang mu dŭh siŭn dŭh rŭŭ.”

¹²Job, mbŭh kah kuu darŭm pimudip mu mritah andu bada isan isan?

¹³Mbŭh kah kuu nggen ukum di isan isan bada nakap ong ka ngugoh daya ginaka so tarun yŭn ngara bisukan?

¹⁴Jawa sandu bada sandah ngga rubān tatŭng mun kuyud piraka, tarang mun inyŭk chop-tandā di tunduh tana-riyat.

¹⁵Jawa sandu paŭh jawa yŭn daya ginaka ka kinarang ngara ndai pingandai ganas.

¹⁶Mbŭh kah kuu di ka rubang piin di rasan rawŭt? Mbŭh kah kuu panu di tunduh rasan rawŭt?

¹⁷Mbŭh kah daya kidaan di kuu tiban adi ngabŭt ong karŭm daya adi mbŭh kabŭs?

¹⁸Puan mu kah munki masam bayah-i ong? Nam aku kambŭi kuu puan sopŭrŭg-i.

¹⁹Puan mu, so ki jawa mandŭg puan kah ani atak karŭm?

²⁰Dapŭd kah kuu taban-i ka yŭn siri baat-i, puan kah taban soduwŭh-i pari ka yŭn pinyirŭŭ-i?

²¹Aku puan kuu dapŭd, sabab kuu mbŭh tuuh ka agi diginŭ di tika ong dog napa!

²²Mbŭh kah kuu di ka birit-pinyirikŭn, di yŭn Aku nyikŭn salju ngga ujen batuh?

²³Aku nyikŭn-i yŭn tika susah, yŭn tipuh bisaad ngga tipuh biperang.

²⁴Mbŭh kah kuu di ka tarun yŭn batŭh andu makat, puan kah di ka tarun yŭn adi so sabak timor poh?

²⁵Asi kareh aran piin yŭn ujen adi bangat ka sidia aran yŭn kijat ngga sabak ribut?

²⁶Asi bada ujen rabu di tarun yŭn adi mating daya dieh?

²⁷Asi misa tana adi badŭh ka pisŭk isa kupai timbu dieh?

²⁸Agi kah sama ujen, bait sama sipot-abun?

²⁹Asi sindŭ piin-maku ngga abun adi maku,

³⁰adi bada piin jadi batuh ka bada tunduh rawŭt maku?

³¹ Dapŭd kuu mŭŭng dudu bitang Pleiades bait kuka bŭŭng adi nguruk Bitang Orion?

³²Dapŭd kuu nyiruton bitang bitang tipuh ka ngatur pimanu bitang Buāng Bās ngga bitang Buāng Sŭ?

³³Puan mu kah ukum-adat adi nguasa rangit, ka dapŭd kah kuu bada-i mritah ong?

³⁴Dapŭd kah kuu nyirais nggen ukum di abun ka bada-i misa kuu ngga ujen?

³⁵Ka kambŭi kuu mritah kijat bada mikirab, an kah-i di ka yŭn mu ka siken, “Ani dinge?”

³⁶Asi kidaan di manuk ibis[67] kan Yang Nile re uba, puan kah adi kidaan di babang nang andu re ujen?[68]

³⁷Asi adi sukup bijak an mirang abun ka bada-i miringe ren ujen,

³⁸ujen adi nguruk dabu bada jadi takang tana?

³⁹Bisa kah kuu ngasū jiroh pinguman yŭn singah, ka pimunos anak singah adi sibŭrŭk

⁴⁰kan-i bisukan darŭm tang, puan kah kajŭn darŭm rubang?

⁴¹Asi paan manuk kak kan-i mikabur jiroh man, kan anak-i mikiap mite man so Aku?