Read Biatah Bidayuh JOB 39 Bible Online

JOB 39 - Biatah Bidayuh bible

JOB 39

¹Puan mu kah sinde kambing darŭd dog biranak? Agi kuu nguan peyu biranak?

²Puan mu kah tian-ki kambing ngga peyu bite? Puan mu kah tika anak-i dog ruwan?

³Puan mu kah sinde dāng dāng anŭ nikok kaja-i an biranak ka ruwan anak-i ka darŭm ong?

⁴Darŭm tarun anak dāng jadi baga ka bake; panu jo ka dŭh re pari.

⁵Asi nggen di kaldi tarun udip bebas? Asi pirupas ngara ka bada ngara bidandong?

⁶Aku nggen di ngara tarun tana-pajam bada jadi arŭn ngara, ka bada ngara udip di rabak garo.

⁷Ngara pijo adŭp-i so kupo adi bidudu, ka mating daya tungang primon ngara ka bada ngara nyiraja.

⁸Darŭd inŭh tarun tana kupai di yŭn ngara man, di yŭn anak kayuh-udip adi barŭm adi ngara jiroh.

⁹An kah dari sapi tarun nyiraja yŭn mu? An kah-i nyirŭmŭn di kandang dāng mu?

¹⁰Dapŭd kah sapi tarun dog mŭŭng ka dog takan bada majak? Puan kah bada-i tarik kayuh bat di ŭmŭh mu?

¹¹Dapŭd kah kuu bisangan di kaldi anŭ, adi raru bake ka harap ayŭh ndai kraja bakar mu?

¹²Bisa kah kuu harap ayŭh sun buwa tana mu ka nguruk gandom so tarun yŭn kuu ngiik?

¹³Munki masam raju-i kabap urad manuk onta! Pak mating manuk onta dapŭd mikabur mun bangau.[69]

¹⁴Manuk onta tingge turoh-i di tana isa paras tana nyiparas-i.

¹⁵Ayŭh dŭh puan nang-i bisa dog digang puan kah dāng tarun mape-i.

¹⁶Ayŭh bada-i mun adi dŭh turoh adŭp-i, ka dŭh piduri adŭp-i rugi.

¹⁷Aku inŭh adi bada ayŭh budo ka dŭh nggen pinyibijak di ayŭh.

¹⁸Pak kan ayŭh bikaduh,[70] ayŭh ngarah kuda ngga pinunggang kuda.

¹⁹Kuu kah anŭ, Job, adi bada kuda raru bake ka adi nggen jari buruh di tungo-i?

²⁰Kuu kah adi bada kuda mirupat mun kadis ka pirawan daya ngga jawŭn so undung-i?

²¹Kuda sigudab ngga kaja-i di tana rubān; ngara bikaduh ka yŭn bisaad ngga situngang tungang-i.

²²Kuda dŭh puan ani rati taru, ka mating pedang adi dapŭd bada ngara ngundur.

²³Sinyata adi pinunggang ngara taban jawŭn ka mikirab di sura.

²⁴Kimŭtŭr buang graŭh, kuda nyurong; kan trompet dog mambak, ngara mbŭh briyuh.

²⁵Di barang jawŭn trompet ngara ndai jawŭn so undung-i; so jo ngara dapŭd kadŭk buuh bisaad, ka dingah bara pingubak soldadu nyirais mritah bara soldadu.

²⁶Agi kah beuh birajar mikabur so kuu kan-i murai urad-i nyisayar ka siratan?

²⁷Agi kah beuh kajŭn pinyibada mu ngga ndai sarin jeh di tibung darŭd?

²⁸Ayŭh ndai arŭn-i di batuh adi siabo bigatung ka bada tibung tibung adi reja jadi kuta-i.

²⁹So nŭ ayŭh ninjau ndi abong tarun jiroh kayuh an-i siŭ ka man.

³⁰ Di tarun yŭn agi tadang, beuh agi tikuruk, ka anak anak beuh nok deya-i.