Read Biatah Bidayuh JOB 41 Bible Online

JOB 41 - Biatah Bidayuh bible

JOB 41

¹ Dapŭd kah kuu nakap Leviathan[73] ngga sibakid pisis iken puan kah mŭŭng jura-i ngga taris baga?

²Dapŭd kah kuu mŭŭng taris baga di tukuk-i puan kah tabŭk sikait di siraka-i?

³Ayŭh re mite turung so kuu bada pirupas adŭp-i kah? Ayŭh re mite so kuu bada masi di adŭp-i kah?

⁴Ayŭh re ndai pekat-janji ngga kuu ka bijanji an bituan di kuu adu adu kah?

⁵Kuu re mŭŭng ayŭh mun manuk adi kuu siŭt, mun kayuh adi ngga pirami bara daya-gaji mu adi dayung kah?

⁶Daya pinakap iken re bitawar kah miris ayŭh? Daya dagang re natad kah ayŭh yŭn jua?

⁷Dapŭd kah kuu tabŭk kurit-i ngga jarok puan kah tabŭk ubak-i ngga sirapang?

⁸Tama ayŭh ndi sidah ka kuu re dŭh tia; kuu dŭh re kambŭt adŭp mu ko birawan ngga ayŭh!

⁹Asi asi adi kiris Leviathan re taru ka mijŭp.

¹⁰Kan ayŭh dog kinuas, ayŭh mangah; mating daya pagan re situra jawin ngga ayŭh.

¹¹Asi dapŭd nyerang ayŭh ka dŭh mani mani? Mating daya di ndi ong ong dapŭd.[74]

¹²Aku an kidaan di kuu munki kaja Leviathan ka nyuse munki masam bās ka bake ayŭh.

¹³Mating daya dapŭd nyiratak jipo tunduh-i puan kah tabŭk jipo-tabar[75] adi-i nēn.

¹⁴Asi dapŭd bada ayŭh kuka baba-i, adi puno ngga jipŭh adi tikaran nŭŭh kiris?

¹⁵Punok-i[76] inŭh puno ngga jari jari dudu pinangin, rakat diginŭ ka riang mun batuh.

¹⁶Sopŭrŭg-i mbŭh bijapit, ndŭg ka sabak asŭng dŭh dapŭd mŭrŭt asah-i.

¹⁷Sopŭrŭg-i kimŭŭt ka dŭh re dapŭd dog nyirakang.

¹⁸Kijat mikirab kan ayŭh pasin, ka batŭh-i bireh mun batŭh andu makat.

¹⁹Jireb apui ruah so baba-i, ka rutop mun bunga apui.

²⁰Asuh ruah so undung-i, mun asuh so uduh sau di ribo priok.

²¹Sabak asŭng-i bada apui sakŭt; jireb apui ruah so baba-i.

²²Tungo-i raru bikuasa ndŭg ka sopŭrŭg daya adi bidapŭd ngga ayŭh taru.

²³Di kurit-i mating tapo adi dŭdŭt; kurit-i riang ka riyat mun basi.

²⁴Atin batuh-i dŭh puan taru, riyat ka riang mun batuh kisar.

²⁵Kan ayŭh burah, adi siabo bake[77] jadi taru; ngara dŭh bigaya amai taru.

²⁶Mating pedang adi dapŭd bada ayŭh tawan; mating jarok, reja-panah, puan kah sigaru adi dapŭd bada ayŭh kinaman.

²⁷Di ayŭh basi mbŭh keya ka tare siriyang, ka timaga mbŭh keya ka adām kayuh adi dŭdŭt.

²⁸Mating reja-panah adi dapŭd bada ayŭh bikaduh bu; batuh adi dog taran ka ayŭh mbŭh keya ka rapuh siriyang.

²⁹Di ayŭh pukong inŭh keya ka ndi sirah siriyang, ka ayŭh tawŭh kan daya jakad jarok.

³⁰Sisik di tain-i mun dudu supek pape priok adi reja; sisik anŭ ngireg tawang mun papan-ngiik.[78]

³¹Ayŭh bada rawŭt nyigurak mun piin paras ka bada-i bibude mun inyo adi darŭm priok.

³²Ayŭh tingge arok-i mikirib ka bada rawŭt bibude buda.

³³Di ong mating kayuh adi bisa nŭŭh ngga danding ayŭh; ayŭh anŭ dāng adi dŭh puan taru.

³⁴Dāng adi siabo sambuh mbŭh dog ngamun-i gŭh; ayŭh inŭh raja di tunduh sopŭrŭg dāng ganas.