Read Biatah Bidayuh JOB 5 Bible Online

JOB 5 - Biatah Bidayuh bible

JOB 5

¹Bagan, Job. Agi kah mating daya nam. Agi kah malaikat adi bisa mu yŭn nyigura?

²Nyusah adŭp mu ngga atin baji ndŭg ka kuu kabŭs inŭh budo buang sipadin.

³Aku mbŭh kiris daya budo adi mun adi siramat, pak aku rasu mangu ramin arŭn ngara.

⁴Anak anak ngara dŭh siramat; mating daya an ngarun ngara di tarun yŭn bisara.

⁵Daya adi sirata re man buwa pimuruh daya adi budo ndŭg ka gandom-i adi timbu di karu reja,[9] ka daya adi gira rata re ripong di kaya raja-i.

⁶Arap dŭh inŭh kayuh adi mandŭg so tana, dŭh gŭh pinyusah timbu so tana.

⁷Adŭp manusia inŭh adi taban pinyusah ka adŭp-i, keya ka bŭtŭp apui adi mikabur so apui.[10]

⁸Kambŭi aku kuu, aku mite turung so Tapa ka kidaan di Ayŭh sopŭrŭg pinyusah ku.

⁹Ata dŭh dapŭd mirati pingandai bās-I, ka pingandai nginga-I mbŭh rabis so tungang ata kira.

¹⁰Ayŭh nggen ujen di tana ka Ayŭh misa ŭmŭh.

¹¹Sawŭ, Tapa inŭh adi pakat daya adi dog ngamun ka bada gaŭn daya adi susah.

¹² Ayŭh pijimŭ pusar daya di pingakar, ka kudog daya adi bijak darŭm atur kraja adŭp ngara, isa mating kayuh ndai ngara mujur;

¹⁴ndŭg ka yun andu ngara kāp tarun keya ka darŭm karŭm.

¹⁵Pak Tapa nyiramat ngara adi sirata[11] so pinyikabŭs; Ayŭh nyiramat daya adi susah so dog kinanyuh.

¹⁶Ayŭh nggen pingarap di daya sirata ka bada pajam daya ginaka.

¹⁷ Sanang inŭh daya adi Tapa ngika! Dŭhnyah tuas kan Ayŭh ngajar kuu.

¹⁸ Tapa bada tawan, pak Ayŭh adi marut tawan anŭ; tangan-I kinaman kuu, ka tangan-I pibua kuu.

¹⁹Ayŭh taŭn mbŭh sidia an grindung kuu so dog pinyusah;

²⁰kan tipuh apag mandŭg, Ayŭh re kudip kuu, ka darŭm perang Ayŭh grindung kuu so dog siŭ.

²¹Tapa re pirupas kuu so dog kinarap; Ayŭh re nyiramat kuu kan pinyirusag mandŭg.

²²Kuu re tawŭh pinyiganas ka apag ka dŭh taru dāng tarun.

²³Ŭmŭh adi kuu majak re dŭh pibatuh; dāng tarun dŭh re nyerang kuu.

²⁴Komŭnŭ kuu re siramat rŭŭ darŭm bari mu; kan kuu pirasa biri mu, kuu re kiris sopŭrŭg-i siramat.

²⁵Kuu re biyŭn bagŭ anak nimun dudu dawŭn kupai di tarun tana kupai.

²⁶Keya ka gandom adi masak dog ngatŭm di tipuh-i, kuu re udip ndŭg ka kuu mbŭh sukup minyamba.

²⁷Job, kieh mbŭh tui nakit pirati kayuh anŭ ka madin kieh mbŭh puan. Kayuh anŭ sawŭ, ka kuu an trima-i.