Read Biatah Bidayuh MAZMUR 102 Bible Online

MAZMUR 102 - Biatah Bidayuh bible

MAZMUR 102

¹[173] Dingah dua ku, O TUHAN, ka dingah sirŭŭn ku mite turung!

²Kan aku dog susah, dŭhnyah bu so aku! Dingah aku, ka rikas nam aku kan aku bagan!

³Pimudip ku miyap mun asuh; pŭrŭng ku nyam adi sau.

⁴Aku rayu mun kupai adi pisŭk; aku abah man.

⁵Aku nyidaing bana; aku mbŭh dŭm turang ngga kurit.

⁶Aku mbŭh keya ka manuk di tarun tana-pajam, mbŭh keya ka manuk bo di tibawang.

⁷Aku guring pak dŭh bŭŭs; aku mbŭh keya ka manuk adi sadi-i di bung bungan.

⁸Ndi andu andu pinganyu ku pimangŭh aku; ngara adi tawŭh aku pakai dŭn ku ngga bipangu.

⁹Sabab baji ngga riyŭn Mai, apŭk jadi pinguman ku, ka randang batŭh ku bigaur ngga piin nok ku. Kaam pakat aku ka taran aku.

¹¹Pimudip ku keya ka singangi di singumi andu; aku keya ka kupai adi pisŭk.

¹²Pak Kaam, O TUHAN, raja ndŭg situi tui; sopŭrŭg turap manusia re ingat Kaam.

¹³Kaam re makat ka masi di Zion; tika mbŭh mandŭg adi ngga Mai masi dieh; ati inŭh tika adi batur ngga Mai ndai simŭnŭ.

¹⁴Urun urun Mai rindu-i, sunggu-i mbŭh dog nyirubuh; ngara masi dieh, sunggu-i mbŭh jadi tibawang.

¹⁵Bangsa bangsa re taru TUHAN; sopŭrŭg raja di ong re taru kuasa-I.

¹⁶Kan TUHAN pari pijog Zion, Ayŭh re pinandŭng bās-I.

¹⁷Ayŭh re dingah daya-I adi-I ko tagan ka dŭh turak pimite ngara.

¹⁸Nuris yŭn tuba bauh kayuh adi TUHAN mbŭh ndai isa daya adi bayuh dog biranak bisa muji Ayŭh.

¹⁹TUHAN tingga ka sagān so yŭn kudus-I di sambu, so shorga Ayŭh tingga ong di sagān.

²⁰Ayŭh dingah sidaing bara daya-takap ka pirupas ngara adi dog nggen ukum kabŭs.

²¹Ka adŭn-I re dog piagah di Zion, ka Ayŭh re dog muji di Jerusalem

²²kan bangsa ngga pritah mandŭg tikuruk ka nyambah TUHAN.

²³TUHAN mbŭh bada aku rumuh darŭm aku gibabŭ mara; Ayŭh bada umbur ku purok.

²⁴O Tapa, dŭhnyah tambit aku madin sibayuh aku minyamba. O TUHAN, Kaam udip adu adu;

²⁵ ndun jah Kaam napa ong, ka ngga tangan adŭp Mai Kaam napa rangit.

²⁶Sopŭrŭg anŭ re miyap, pak Kaam re babŭ; sopŭrŭg-i re rusak mun piraka. Kaam re taran-i mun taran piraka, ka sopŭrŭg-i re mating tia.

²⁷Pak Kaam dŭh re birubah, ka udip Mai dŭh re mungan.

²⁸Bara anak ami re udip ngga siramat, ka di ribo pinyigrindung Mai sesang ngara re pagŭng.