Read Biatah Bidayuh MAZMUR 103 Bible Online

MAZMUR 103 - Biatah Bidayuh bible

MAZMUR 103

¹[174] Muji meh TUHAN, simangi ku! Pimudip ku, muji meh adŭn kudus-I!

²Muji meh TUHAN, simangi ku, ka dŭhnyah kambŭt munki masam mandis Ayŭh.

³Ayŭh apun sopŭrŭg dosa ku ka pibua sopŭrŭg andam ku.

⁴Ayŭh pijo aku so rubang kubur ka nyiberkat aku ngga pinyirindu ka pinyirasi.

⁵Ayŭh ngisi pimudip ku[175] ngga kayuh kana, isa aku babŭ mara ka bake mun beuh.

⁶Yŭn ngara adi dog kinanyuh, TUHAN taban pinyitŭnggŭn ka nggen hak ngara.

⁷Ayŭh pinandŭng di Moses kayuh adi raan-I ndai ka bada daya Israel kiris pingandai bās-I.

⁸ TUHAN inŭh puno ngga pinyirasi ngga pinyirindu, sais baji buang puno ngga pinyirindu adi dŭh bisa birubah.

⁹Ayŭh dŭh adu adu an nyarah; Ayŭh dŭh adu adu baji.

¹⁰Ayŭh dŭh ngukum ata nanyam adi patut ata trima, Ayŭh dŭh maras ata nanyam ka arap ta.

¹¹Nimun rangit bigatung jo so tana, bās inŭh pinyirindu-I di ngara adi stabi di Ayŭh.

¹²Jo nimun timor so barat, simŭnŭ inŭh dosa ta Ayŭh kadi so ata.

¹³Nimun sama mandis ngga bara anak-i, simŭnŭ inŭh TUHAN mandis ngga ngara adi stabi di Ayŭh.

¹⁴Ayŭh puan kayuh adi so ta dog napa; Ayŭh ingat ata ati tana adŭ.

¹⁵Ka ata ati, udip ta inŭh keya ka kupai. Ata timbu ka udip mun bunga tarun;

¹⁶komŭnŭ sabak poh-i, ka rasu miyap -- mating daya kiris-i dinge.

¹⁷Pak di ngara adi stabi di TUHAN, pinyirindu-I tan ndŭg situi tui, ka pinyikana-I tan adu adu yŭn sopŭrŭg turap

¹⁸ngara adi bidigŭng tagap di simanya-I ka adi tŭtŭd tunda pinyipesan-I.

¹⁹TUHAN na takta-I di shorga; ka Ayŭh inŭh raja yŭn sopŭrŭg adi-I napa.

²⁰Muji meh TUHAN, angān malaikat adi bake ngga adi bikuasa, adi tunda pinyipesan-I, adi dingah pinganang-I,

²¹Muji meh TUHAN, sopŭrŭg ngan kuasa di rangit, angān adi urun-I, adi ndai nanyam pinyiraan-I!

²²Muji meh TUHAN, sopŭrŭg adi-I ko napa di barang yŭn Ayŭh mritah. Muji meh TUHAN, simangi ku!