Read Biatah Bidayuh MAZMUR 104 Bible Online

MAZMUR 104 - Biatah Bidayuh bible

MAZMUR 104

¹Muji meh TUHAN, simangi ku! O TUHAN, Tapa ku, munki masam bās-i Kaam! Kaam inŭh puno ngga kuasa ka bragah;

²Kaam marut adŭp Mai ngga jawa. Kaam mamad rangit keya ka sakŭb bari

³ka pijog ramin Mai di tunduh piin di sambu.[176] Abun inŭh krita kuda Mai ka sabak inŭh urad-i.

⁴ Kaam pakai sabak ndu pinyisung Mai ka kirab kijat ndu urun Mai.

⁵Kaam mbŭh pijog ong bada tagap di tunduh pinagap rasan-i, ka dŭh-i dapŭd dog ngana.

⁶Kaam na rawŭt di tunduh-i keya ka jipo-ambu, ka piin nutu dudu darŭd.

⁷Kan Kaam nyara piin, ka-i bu; ngara babak kan ngara dingah kuasa sirŭŭn Mai.

⁸Ngara aman so darŭd ka mŭrŭt rubān, di ka yŭn adi Kaam mbŭh napa yŭn ngara.

⁹Kaam na jiri baat adi ngara dŭh siŭn mutas, isa ngara dŭh ngapuh ong dinge.

¹⁰Kaam bada rubang piin piruah piin di rubān, ka sungi aman di asah sandah.

¹¹Ngara nggen piin yŭn dāng tarun; diginŭ kaldi tarun pimunos asŭng badŭh-i.

¹²Di tŭngŭn tŭngŭn kayuh adi sindŭk anŭ, dudu manuk ndai sarin-i ka biragu.

¹³So rangit Kaam pait ujen di tunduh sandah, ka tana puno ngga berkat Mai.

¹⁴Kaam bada kupai timbu yŭn sapi ka anak kayuh adi timbu yŭn guna manusia, isa ngara bisa purun pimuruh ngara

¹⁵ka piruah wain ngga bada ngara gaŭn, inyo kanā ngga bada ngara pawŭn, ka ruti ngga bada ngara bake.

¹⁶Tŭngŭn sedar Lebanon dapŭd bagŭ piin ujen -- TUHAN dapu tŭngŭn kayuh, adi Ayŭh purun.

¹⁷Diginŭ manuk bisarin; ka bangau bisarin di tibung-i.

¹⁸Kambing tarun udip di darŭd bigatung, ka dŭngŭn batuh bisukan di jenjang.

¹⁹Kaam napa buran ngga nandā tipuh; batŭh andu puan sinde-i mūn.

²⁰Kaam napa singarŭm, ka ngga karŭm sopŭrŭg dāng tarun ruah.

²¹Singah adi mara ngŭr darŭm ngara jiroh man, jiroh pinguman adi Tapa nggen.

²²Kan batŭh andu makat, ngara pari ka guring di yŭn ngara bisukan.

²³Komŭnŭ daya ruah di ndai kraja ngara ka nyiraja ndŭg singumi andu.

²⁴TUHAN, Kaam mbŭh napa bagŭ masam kayuh! Ngga pinyibijak Mai Kaam napa sopŭrŭg-i! Ong puno ngga kayuh adi mikitak adi Mai napa.

²⁵Agi rawŭt, adi bayah ngga adi bās, diginŭ agi bagŭ masam dāng udip, adi baga ngga adi sŭ.

²⁶ Kapar birayar dieh, ka diginŭ Leviathan birubi, dāng-bās rawŭt anŭ adi Kaam napa.[177]

²⁷Sopŭrŭg-i bisangan di Kaam yŭn dapŭd pinguman di tika ngara raan-i.

²⁸Kaam nggen-i di ngara, ka ngara man-i; Kaam nggen pinguman, ka ngara bisoh.

²⁹Kan Kaam sukan jawin Mai, ngara taru; kan Kaam tambit asŭng ngara, ngara kabŭs ka pari ka tana adi so ngara mandŭg.

³⁰Pak kan Kaam nggen asŭng di ngara,[178] ngara jadi dog napa; Kaam nggen udip bauh di ong.

³¹Isa-i bragah TUHAN tan ndŭg situi tui! Isa-i TUHAN gaŭn ngga kayuh adi-I mbŭh napa!

³²Ayŭh tingga ong, ka-i kimŭtŭr; Ayŭh tama darŭd, ka ngara piruah asuh.

³³Aku re biragu yŭn TUHAN sitŭkŭd udip ku; sitŭkŭd udip ku aku re nang ragu puji ka Tapa ku.

³⁴Isa-i Ayŭh munos asŭng di ragu ku, amai Ayŭh inŭh adi bada aku gaŭn.

³⁵Isa-i ngara adi bidosa dog kadi so ong; isa-i daya ginaka mating tia. Muji meh TUHAN, simangi ku! Muji meh TUHAN!