Read Biatah Bidayuh MAZMUR 105 Bible Online

MAZMUR 105 - Biatah Bidayuh bible

MAZMUR 105

¹Nggen trima kaseh ka TUHAN, piagah bās-I; kidaan di barang bangsa kayuh adi-I mbŭh ndai.

²Nang ragu puji ka TUHAN; kidaan kayuh saruh adi-I mbŭh ndai.

³Gaŭn meh amai ata tung jangi; bada sopŭrŭg adi nyambah Ayŭh gaŭn.

⁴Di ka yŭn TUHAN mite turung; ka nyambah Ayŭh adu adu.

⁵Angān adi sesang Abraham, urun-I; angān sesang Jacob, daya adi-I mien: ingat pingandai-nginga adi Tapa ndai ka ukum adi-I mbŭh nggen.

⁷TUHAN inŭh Tapa ta; pinyipesan-I inŭh yŭn ndi ong ong.

⁸Ayŭh re digŭng simanya-I adu adu, janji-I yŭn siribu turap manusia.

⁹ Ayŭh re sita pekat-janji adi-I ndai ngga Abraham ka janji-I ngga Isaac.

¹⁰ TUHAN ndai simanya ngga Jacob, simanya adi tan ndŭg situi tui.

¹¹“Aku re nggen di kuu tarun tana Canaan,” Ayŭh nang. “Tana anŭ re jadi bisaka ngan.”

¹²Daya Tapa dŭh bagŭ, ngara daya saruh di tarun tana Canaan.

¹³Ngara bigandon so rais ndi ndŭg rais andi, so pritah ndi ndŭg pritah andi.

¹⁴ Pak Tapa bada daya dŭh kinanyuh ngara; ngga grindung ngara, Ayŭh bakan bara raja:

¹⁵“Dŭhnyah ida ida ngga bara urun Ku adi Aku mbŭh mien; dŭhnyah bada bara nabi Ku kinaman.”

¹⁶ TUHAN pait apag ka rais ngara ka tambit sopŭrŭg pinguman ngara.

¹⁷ Pak Ayŭh pait ndi naan daya diŭ so ngara, Joseph, adi ko dog jua jadi urun.

¹⁸ Kaja-i dog mŭŭng ngga parik basi, ka abŭt basi di tungo-i,

¹⁹ndŭg ka kayuh adi-i ko ninjau jadi bitŭtŭk. Pinganang TUHAN kiren nang ayŭh batur.

²⁰ Komŭnŭ raja di Egypt pirupas ayŭh; pinguasa bangsa pirupas ayŭh.

²¹ Ayŭh bada ayŭh jadi pingubak yŭn sopŭrŭg kayuh darŭm pritah-i ka bada ayŭh nguasa ndi tarun tana rais,

²²ngga kuasa di tunduh bara pinurung raja ka kuasa mritah bara adi tukang pitayan.

²³ Komŭnŭ Jacob di ka Egypt ka piramin di rais anŭ.

²⁴ TUHAN nggen bagŭ anak di daya-I ka bada ngara bake so bara pinganyu ngara.

²⁵Ayŭh bada daya Egypt tiru di daya-I ka nipu bara urun-I.

²⁶ Komŭnŭ Ayŭh pait urun-I Moses, ngga Aaron, adi Ayŭh mbŭh mien.

²⁷Ngara ndai pingandai bās Tapa ka ndai pingandai-nginga di Egypt.

²⁸ Tapa bada ndi tarun tana karŭm, pak daya Egypt dŭh tunda[179] pinganang-I.

²⁹ Ayŭh bada piin piin sungi ngara marui jadi deya ka siŭ sopŭrŭg iken adi agi dieh.

³⁰ Rais ngara dog nyerang dudu tigarag, ndŭg ka istana mbŭh puno ngga tigarag.

³¹ Tapa bada dudu tura ngga biyas nyerang ndi tarun tarun tana rais.

³² Ayŭh pait ujen batuh ngga kijat di tarun tana ngara ngga gati ujen biasa;

³³Ayŭh pirusak tŭngŭn anggor ngga tŭngŭn ara ngara ka pitumbang sopŭrŭg tŭngŭn kayuh.

³⁴ Ayŭh minyu, ka kadis mandŭg, bijuta juta sopŭrŭg-i, ka dŭh tungang dog mirang;

³⁵kadis man sopŭrŭg kayuh adi timbu di tana; ka man sopŭrŭg pimuruh ngara.

³⁶ Ayŭh siŭ anak anak pinuai dari di barang rawang di Egypt.

³⁷ Komŭnŭ Ayŭh nguru bara daya Israel ruah; ngara taban pirak ngga mas, ka sopŭrŭg ngara tiranah buang bake.

³⁸Daya Egypt taru di ngara ka mbŭh gaŭn kan ngara bu.

³⁹ Tapa bada abun nyayung daya-I ka singarŭm apui ngga pijawa ngara.

⁴⁰ Ngara[180] mite, ka Ayŭh nggen manuk pŭpŭng; Ayŭh nggen di ngara pinguman so shorga ngga pimunos ngara.

⁴¹ Ayŭh mape sandah batuh, ka piin ruah so dieh, aman di tarun tana-pajam mun sungi.

⁴²Ayŭh ingat janji kudus-I di Abraham urun-I.

⁴³Jadi Ayŭh nguru daya adi-I ko mien ngga ruah, ka ngara biragu ka nyirais ngga gaŭn.

⁴⁴ Ayŭh nggen di ngara tana daya bŭkŭn ka bada ngara tambit teya teya ngga ŭmŭh ngara ani,

⁴⁵isa daya-I tunda ukum adat-I ka sita sopŭrŭg pinyipesan-I. Muji meh TUHAN!