Read Biatah Bidayuh MAZMUR 108 Bible Online

MAZMUR 108 - Biatah Bidayuh bible

MAZMUR 108

¹[183] Aku biyŭn sukup atin sabah, O Tapa! Aku re biragu ka muji Kaam! Makat meh, simangi ku!

²Makat meh, kachapi ngga gambus ku! Aku re kies batŭh andu,

³Aku nggen trima kaseh di Kaam, O TUHAN, di dupan dudu bangsa. Aku re muji Kaam di dupan bara daya.

⁴Pinyirindu Mai adi dŭh bisa birubah mbŭh bigatung so rangit; pinyitŭtŭd Mai mbŭh ndŭg rangit.

⁵Bada bās Mai tatŭng di rangit, O Tapa, ka bragah Mai di ndi ong ong.

⁶Nyiramat kieh ngga kuasa Mai; nam dua ku, isa daya adi Kaam rindu bisa dog pirupas.

⁷So yŭn pinyirŭŭ-I[184] Tapa mbŭh nang, “Darŭm pimanang Aku re kutung Shechem nyinuwŭh ka nggen Rubān Sukkoth di daya Ku.

⁸Gilead inŭh jaku, ka simŭnŭ gŭh Manasseh; Ephraim inŭh tupi basi Ku ka Judah inŭh sikud-pinyipritah Ku.

⁹Pak Aku re pakai Moab ndu sambong-pinyingu Ku ka Aku re taran kasut Ku ka Edom, ndu tandā Aku dapu-i. Aku re nyirais darŭm pimanang ngarah daya Philistine.”

¹⁰Asi, O Tapa, re taban aku ka darŭm kupo adi bikuta? Asi re nguru aku ka Edom?

¹¹Kaam sawŭ mbŭh tirawan aku kah? Dŭh kah Kaam re ruah baris ngga bara soldadu ami?

¹²Turung kieh rawan pinganyu ami; pinurung manusia inŭh au-tarun.

¹³Ayō Tapa, ata re manang; Ayŭh re ngarah pinganyu ta.