Read Biatah Bidayuh MAZMUR 116 Bible Online

MAZMUR 116 - Biatah Bidayuh bible

MAZMUR 116

¹Aku rindu TUHAN, sabab Ayŭh dingah aku; Ayŭh dingah dua ku.

²Ayŭh dingah aku barang andu aku bagan Ayŭh.

³Pinyikabŭs nyikapung aku; rubang kubur nyindŭk aku; aku mbŭh raru taru buang susah.

⁴Komŭnŭ aku bagan TUHAN, “Aku mite Kaam, TUHAN, nyiramat aku!”

⁵TUHAN inŭh masi buang kana; Tapa ta inŭh pinyirasi.

⁶TUHAN grindung daya adi gibayuh pandai jaga adŭp-i; kan aku re dog pinyusah, Ayŭh nyiramat aku.

⁷Tanang meh, atin ku, sabab TUHAN mbŭh kana ngga aku.

⁸TUHAN nyiramat aku so pinyikabŭs; Ayŭh bitan randang batŭh ku ka bada aku dŭh dog ngarah.

⁹Ka aku meh panu di sirung jawin TUHAN di ong daya adi udip.

¹⁰ Aku babŭ gŭh sabah, sunggu di tika aku nang, “Aku mbŭh batur rabu,”

¹¹sunggu di tika aku taru ka nang, “Mating daya bisa dog sabah.”

¹²Ani bisa aku jugan ka TUHAN amai sopŭrŭg pinyikana-I di aku?

¹³Aku re taban sadis wain ka TUHAN, ngga nggen trima kaseh di Ayŭh amai nyiramat aku.

¹⁴Di tika sopŭrŭg daya-I tikuruk aku re nggen di Ayŭh kayuh adi aku mbŭh bijanji an nggen.

¹⁵Munki masam mandam-i di TUHAN kan ndi so daya-I kabŭs!

¹⁶Aku ati urun Mai, TUHAN; aku bituan di Kaam, tunda gaya sindŭ adŭp ku. Kaam mbŭh nyiramat aku so pinyikabŭs.

¹⁷Aku re nggen di Kaam sadis trima kaseh ka jugan dua ku ka Kaam.

¹⁸Di tika sopŭrŭg daya Mai tikuruk, di yŭn pinyirŭŭ Mai darŭm Ramin Mai di Jerusalem, aku re nggen di Kaam kayuh adi aku mbŭh bijanji an nggen. Muji meh TUHAN!