Read Biatah Bidayuh MAZMUR 139 Bible Online

MAZMUR 139 - Biatah Bidayuh bible

MAZMUR 139

¹[209] TUHAN, Kaam mbŭh piruh aku ka puan aku.

²Kaam puan sopŭrŭg kayuh adi aku ndai; so jo Kaam mirati pikir-kira ku.

³Kaam kiris aku, bait-i aku nyiraja puan kah rŭŭ-paya; Kaam puan sopŭrŭg urah-rakah ku.

⁴Ndŭg ka diŭ so aku minyu, Kaam mbŭh puan kayuh adi re ku nang.

⁵Kaam agi maning aku di barang parad; Kaam grindung aku ngga kuasa Mai.

⁶Pinyipuan Mai pasar aku inŭh raru tŭrŭp; rabis so tungang aku mirati.

⁷Kamaki aku re bisukan so Kaam? Kamaki aku re bu so yŭn Mai?

⁸Kambŭi aku maad ka shorga, Kaam agi diginŭ; kambŭi aku bŭŭs di sibayan, Kaam agi diginŭ.

⁹Kambŭi aku mikabur jeh tambus timor puan kah rŭŭ jeh di yŭn adi jo di barat,

¹⁰Kaam agi diginŭ nguru aku, Kaam agi diginŭ turung aku.

¹¹Aku bisa bada karŭm nutu aku puan kah bada jawa adi maning aku jadi karŭm,

¹²pak karŭm dŭh sukup karŭm di Kaam, ka karŭm mbŭh mun jawa sandu. Karŭm ngga jawa brimun di Kaam.

¹³Kaam napa ani ani adi agi darŭm pŭrŭng ku; Kaam pijadi aku darŭm ite sindŭ ku.

¹⁴Aku muji Kaam sabab Kaam dog taru; sopŭrŭg kayuh ndai Mai saruh ka bās. Aku puan-i ngga siabo atin ku.

¹⁵Kan turang ku dog pijadi, nakit dog tubu darŭm ite sindŭ ku, kan aku udip diginŭ darŭm bisukan, Kaam puan aku agi diginŭ --

¹⁶Kaam kiris aku diŭ so aku dog biranak. Tipuh adi ngga aku udip mbŭh dog nuris darŭm surat Mai, diŭ so andu-i adi ndi piguru.

¹⁷O Tapa, munki masam mbar-i pikir-kira Mai di aku;[210] munki masam bagŭ-i pikir-kira Mai!

¹⁸Kambŭi aku mirang, ayŭh re bagŭ so sirah sumat. Kan aku burah, aku babŭ agi ngga Kaam.

¹⁹O Tapa, siŭ nŭh daya adi ginaka! ka pijo so aku daya adi ganas!

²⁰Ngara nang kayuh arap pasar Kaam; ngara nang kayuh arap pasar adŭn Mai.[211]

²¹O TUHAN, aku tiru ngara adi tiru di Kaam! Aku ngamun ngara adi rawan Kaam!

²²Aku tiru di ngara ngga siabo atin ku; aku nyirundeng ngara pinganyu ku.

²³Piruh aku, O Tapa, ka puan meh pikir ku; suba aku, ka puan meh pikir-kira ku.

²⁴Pirasa atin ku ka tingga agi kah mating arap ku ka nyiruton aku di aran adi tan adu adu.[212]