Read Biatah Bidayuh MAZMUR 140 Bible Online

MAZMUR 140 - Biatah Bidayuh bible

MAZMUR 140

¹[213] Nyiramat aku, TUHAN, so daya adi arap; nyiramat aku so daya adi ganas.

²Ngara ari bipekat ndai arap, ari nimbur kaii.

³ Jura ngara inŭh keya ka jippŭh adi bisā; pinganang ngara inŭh keya ka rasun jippŭh-sanduk.

⁴Grindung aku, TUHAN, so kuasa daya ginaka; nyiramat aku so daya adi ganas adi bipekat an pirabu aku.

⁵Daya adi sambuh tŭŭn jarat yŭn kudog aku; ngara mbŭh tŭŭn jaring ngga nakap aku ka di aran ngara mbŭh tŭŭn jarat ngga nyijarat aku.

⁶Aku nang di TUHAN, “Kaam inŭh Tapa ku.” Dingah sirŭŭn ku mite turung, TUHAN!

⁷TUHAN adi Raja ku, pingibān ku adi bake, Kaam grindung aku di tika biperang.

⁸TUHAN, dŭhnyah nggen di daya adi ginaka kayuh adi ngara raan; dŭhnyah bada pekat ngara mujur.

⁹Dŭhnyah bada pinganyu ku manang;[214] bada pinganang arap ngara nyatŭk adŭp ngara.

¹⁰Isa-i bam apui nyatŭk ngara; isa-i ngara dog taran ka darŭm rubang ka dŭh tungang makat.

¹¹Bada dŭh mujur daya adi napŭ daya; isa-i arap nyandat daya adi ganas ka pirabur ngara.

¹²TUHAN, aku puan Kaam kingat ngga pinyitŭnggŭn daya adi misakin ka kingat hak daya adi sirata.

¹³Daya tŭnggŭn re sawŭ muji Kaam; ngara re rŭŭ di yŭn pinyirŭŭ Mai.