Read Biatah Bidayuh MAZMUR 143 Bible Online

MAZMUR 143 - Biatah Bidayuh bible

MAZMUR 143

¹[219] TUHAN, dingah dua ku! Darŭm pinyitŭnggŭn Mai dingah pimite ku; nam aku darŭm pinyitŭtŭd Mai!

² Dŭhnyah na aku, urun Mai, darŭm pisuba; mating daya dŭh sarah di batŭh Mai.

³Pinganyu ku mbŭh ngasū aku ka mbŭh ngarah aku. Ngara mbŭh na aku darŭm jer adi karŭm, ka aku mbŭh keya ka daya adi mbŭh tui kabŭs.

⁴Jadi aku mbŭh re an jimŭ; aku mbŭh dŭh bigaya.

⁵Aku ingat tipuh adi mbŭh ripas; aku bipikir pasar sopŭrŭg kayuh adi Kaam mbŭh ndai, aku bipikir pasar pingandai Mai.

⁶Aku pakat tangan ku ka Kaam darŭm bidua; keya ka tana badŭh simangi ku biguna di Kaam.

⁷Nam aku madin, TUHAN! Mbŭh mating pingarap ku tia. Dŭhnyah sukan adŭp Mai so aku, kambŭi dŭh aku re ndi so ngara adi mūn ka sibayan.

⁸Bada aku ingat barang isan pinyirindu Mai adi dŭh bisa birubah, amai aku sabah di Kaam. Dua ku maad ka Kaam; kiren di aku aran aku patut kadŭg.

⁹Aku di ka Kaam yŭn pinyigrindung, TUHAN; pirupas aku so pinganyu ku.

¹⁰Kaam inŭh Tapa ku; ngajar aku ndai pinyiraan Mai. Kana ngga aku, ka nyiruton aku di aran adi siramat.

¹¹Pirupas aku, TUHAN, nimun Kaam mbŭh janji; darŭm pinyikana Mai nyiramat aku so pinyusah!

¹²Sabab pinyirindu Mai di aku, siŭ pinganyu ku ka pirabur sopŭrŭg ngara adi kinanyuh aku, amai aku ati urun Mai.