Read Biatah Bidayuh MAZMUR 145 Bible Online

MAZMUR 145 - Biatah Bidayuh bible

MAZMUR 145

¹[221] Aku re piagah bās Mai, Tapa ku ka Raja ku; aku re nggen trima kaseh di Kaam adu adu.

²Barang andu aku re nggen trima kaseh di Kaam; aku re muji Kaam adu adu.

³TUHAN inŭh bās ka patut bana dog muji; bās-I rabis so tungang dog mirati.

⁴Kayuh adi Kaam mbŭh ndai re dog muji so turap ndi ndŭg turap andi; ngara re piagah pingandai bās Mai.

⁵Ngara re minyu pasar bragah ngga kuasa Mai, ka aku re nakit bipikir di pingandai Mai adi grua.

⁶Daya re minyu pasar pingandai bās Mai, ka aku re piagah bās Mai.

⁷Ngara re kidaan pasar sopŭrŭg pinyikana Mai ka biragu pasar pinyimandis Mai.

⁸TUHAN inŭh pinyirindu ka masi, sais baji ka puno ngga pinyirindu adi dŭh bisa birubah.

⁹Ayŭh kana ngga barang naan daya ka mbŭh masi di sopŭrŭg adi-I mbŭh napa.

¹⁰Sopŭrŭg adi mbŭh Mai napa, TUHAN, re muji Kaam, ka sopŭrŭg daya re nggen trima kaseh di Kaam.

¹¹Ngara re minyu pasar bragah kuasa-raja Mai ka kidaan pasar kuasa Mai,

¹²isa barang naan re puan pasar pingandai bās Mai ka pasar kuasa pinyipritah Mai adi bibragah.

¹³Pinyipritah Mai inŭh tan adu adu, ka Kaam inŭh raja ndŭg situi tui. TUHAN inŭh tŭtŭd ngga janji-I, ka darŭm sopŭrŭg pingandai-I ayŭh puno ngga masi.

¹⁴Ayŭh turung ngara adi dog pinyusah; Ayŭh pakat ngara adi mbŭh rabu.

¹⁵Sopŭrŭg kayuh udip tingga Ayŭh ngga pingarap, ka Ayŭh nggen di ngara pinguman kan ngara biguna-i.

¹⁶Kaam nggen sukup di ngara ka bada sopŭrŭg puas.

¹⁷TUHAN inŭh tŭnggŭn di sopŭrŭg kayuh ndai-I, di sopŭrŭg pingandai-I Ayŭh puno ngga masi.

¹⁸Ayŭh sindŭk ngara adi bagan Ayŭh, adi bagan Ayŭh ngga atin sawŭ.

¹⁹Ayŭh nggen pinyiraan ngara adi stabi di Ayŭh; Ayŭh dingah sien ngara ka nyiramat ngara.

²⁰Ayŭh grindung barang naan daya adi rindu Ayŭh, pak Ayŭh re pirabur daya ginaka.

²¹Aku re ari muji TUHAN; ka bada sopŭrŭg adi-I napa muji adŭn kudus-I ndŭg situi tui.