Read Biatah Bidayuh MAZMUR 146 Bible Online

MAZMUR 146 - Biatah Bidayuh bible

MAZMUR 146

¹Muji meh TUHAN! Muji meh TUHAN, simangi ku!

²Aku re muji Ayŭh sitŭkŭd aku udip; aku re biragu yŭn Tapa siumbur udip ku.

³Dŭhnyah sabah di pinguru manusia; mating manusia dapŭd nyiramat angān.

⁴Kan ngara kabŭs, ngara pari ka tana; di andu anŭ sopŭrŭg pusar ngara mungan.

⁵Sanang inŭh ngara adi biyŭn Tapa Jacob nyiramat ngara ka adi bisangan di TUHAN adi Tapa ngara,

⁶ adi napa rangit, ong, ka rawŭt, ka sopŭrŭg adi darŭm-i. Ayŭh ari ndai nanyam ka janji-I;

⁷ngga pinyitŭnggŭn Ayŭh turung daya adi dog kinanyuh ka nggen pinguman di ngara adi sibŭrŭk. TUHAN pirupas daya-takap

⁸ka bada daya karak dapŭd kiris. Ayŭh pakat ngara adi rabu; Ayŭh rindu daya tŭnggŭn.

⁹Ayŭh grindung daya saruh adi udip di tarun tana ta; Ayŭh turung dayung uban ngga anak tumang, pak pirabur daya adi ginaka.

¹⁰TUHAN inŭh raja ndŭg situi tui. Tapa mu, O Zion, re mritah adu adu. Muji meh TUHAN!