Read Biatah Bidayuh MAZMUR 147 Bible Online

MAZMUR 147 - Biatah Bidayuh bible

MAZMUR 147

¹Muji meh TUHAN! Kana inŭh nang ragu puji ka Tapa ta; taŭn-i kana ka batur nŭŭh muji Ayŭh.

²TUHAN pari pijog Jerusalem; Ayŭh taban pari tibaran tibaran adi dog taran.

³Ayŭh nguri atin ngara adi asur, ka marut tawan ngara.

⁴Ayŭh mbŭh natu kiang bitang, ka nggen dŭn di barang bitang.

⁵Bās ka bikuasa inŭh TUHAN ta; pinyibijak-I dŭh tungang dog kira.

⁶Ayŭh pakat ngara adi pirapat adŭp-i, pak bada asur di tana daya ginaka.

⁷Nang ragu puji ka TUHAN; main ragu ngga kachapi ka Tapa ta.

⁸Ayŭh mamad abun di rangit; Ayŭh nggen ujen di ong ka bada kupai timbu di sandah.

⁹Ayŭh nggen pinguman di dāng ka paan anak manuk kak kan-i mikiap.

¹⁰Ayŭh dŭh mbit piduri di pinyibake kuda, dŭh gŭh Ayŭh angan soldadu adi birani;

¹¹pak Ayŭh rindu ngara adi stabi di Ayŭh, ngara adi sabah di pinyirindu-I adi dŭh bisa birubah.

¹²Muji meh TUHAN, O Jerusalem! Muji meh Tapa mu, O Zion!

¹³Ayŭh bada tiban tiban-bās mu tagap; Ayŭh nyiberkat daya mu.

¹⁴Ayŭh bada baat mu siramat ka bada kuu puas ngga gandom adi kana.

¹⁵Ayŭh nggen pesan di ong, ka kayuh adi nang-I rikas dog ndai.

¹⁶Ayŭh mamad salju mun putong ka bada mingare mun dabu, abun adi maku.

¹⁷Ayŭh bada ujen batuh rabu mun anak anak batuh; mating daya tungang nyijŭn adud adi-I pait!

¹⁸Ayŭh minyu, ka piin-maku riris; Ayŭh pait sabak, ka piin aman.

¹⁹Ayŭh nggen ajar di daya-I, atur-adat ngga ukum adat-I di Israel.

²⁰Ayŭh dŭh ndai simŭnŭ di bangsa bŭkŭn; ngara dŭh puan ukum adat-I. Muji meh TUHAN!