Read Biatah Bidayuh MAZMUR 18 Bible Online

MAZMUR 18 - Biatah Bidayuh bible

MAZMUR 18

¹[23] Aku rindu Kaam, TUHAN! Kaam inŭh adi pingibān ku.

²TUHAN inŭh adi grindung aku; Ayŭh inŭh kuta ku adi tagap. Tapa ku inŭh pinyigrindung ku, ngga Ayŭh aku siramat. Ayŭh grindung aku keya ka pinangin; Ayŭh ngibān aku ka kingat aku.

³Aku bagan, mite turung so TUHAN, ka Ayŭh nyiramat aku so bara pinganyu ku. Muji meh TUHAN!

⁴Pinyikabŭs kirurung aku, pinyirusag paman ngapuh aku.

⁵Pinyikabŭs sindŭk aku, ka kubur tŭŭn jarat-i yŭn kudog aku.

⁶Di tika susah aku bagan TUHAN, aku bagan Tapa ku yŭn mite turung. Di Ramin-I Ayŭh dingah sirŭŭn ku; Ayŭh dingah sien ku mite turung.

⁷Komŭnŭ tana bigagar ka bigugoh; ka sigŭn darŭd gimŭgŭs ka biguyut, amai Tapa mbŭh baji.

⁸Asuh ruah so rubang undung-I jireb apui ngga bam apui ruah so baba-I.

⁹Ayŭh nyiratak rangit ka mūn ngga kruman di ribo kaja-I.

¹⁰Ayŭh mikabur raju nunggang cherubim, Ayŭh panu ngga urad sabak.

¹¹Ayŭh nutu adŭp-I ngga karŭm; abun tabar, puno ngga piin, kirurung Ayŭh.

¹²Ujen batuh ka kirab apui mandŭg so kijat di sirung jawin-I ka miratos kruman.

¹³Komŭnŭ TUHAN bidudū mandŭg so rangit; ka sirŭŭn-I adi Sambu Sopŭrŭg dog dingah.[24]

¹⁴Ayŭh nimbak reja panah-I ka bada bara pinganyu-I basak basik; ngga kirab kijat Ayŭh bada ngara bikaduh bu.

¹⁵Rasan rawŭt tatŭng, ka pinagap-rasan tana tatŭng, kan Kaam nang bara pinganyu Mai, TUHAN, ka bidudū baji di ngara.

¹⁶TUHAN nyapai so sambu ka digŭng aku; Ayŭh tarik aku so piin tŭrŭp.

¹⁷Ayŭh pirupas aku so bara pinganyu ku adi bake ka so ngara adi tiru di aku -- ngara ruai bake so aku.

¹⁸Kan aku darŭm susah, ngara nyerang aku, pak TUHAN grindung aku.

¹⁹Ayŭh turung aku ruah so kayuh arap; Ayŭh nyiramat aku sabab Ayŭh munos asŭng di aku.

²⁰TUHAN ngupah aku sabab aku ndai kayuh adi batur; Ayŭh nyiberkat aku sabab aku dŭh sarah.

²¹Aku tunda ukum-adat TUHAN; aku mating nyipunok Tapa ku.

²²Aku agi sita sopŭrŭg ukum adat-I; aku bŭn dŭh tunda pinyipesan-I.

²³Ayŭh puan aku dŭh sarah, ka aku pijo adŭp ku so pingandai sarah.

²⁴Ka Ayŭh ngupah aku sabab aku ndai kayuh adi batur, sabab Ayŭh puan aku dŭh sarah.

²⁵O TUHAN, Kaam tŭtŭd ngga ngara adi tŭtŭd ngga Kaam; sukup kana ngga ngara adi sukup kana.

²⁶Kaam kiren adŭp Mai bisig di ngara adi bisig, pak gaok ngga ngara adi ginaka.

²⁷Kaam nyiramat ngara adi pirapat adŭp-i, pak Kaam pirapat ngara adi sambuh.

²⁸O TUHAN, Kaam nggen jawa di aku; Kaam kadi karŭm ku.

²⁹Kaam nggen pinyibake di aku ngga nyerang bara pinganyu ku ka kuasa ngga ngarah kuta ngara.

³⁰Tapa ati -- munki masam sukup kana-i pingandai-I! pinganang-I bisa dog sabah! Ayŭh keya ka pinangin yŭn sopŭrŭg adi jiroh pinyigrindung.

³¹TUHAN sadi adŭ Tapa; Tapa sadi adŭ pingibān ta.

³²Ayŭh Tapa adi bada aku bake, adi bada aran ku siramat.

³³ Ayŭh bada kaja ku tagap mun kaja peyu; Ayŭh bada aku siramat di darŭd.

³⁴Ayŭh pirates aku yŭn biperang, isa aku dapŭd pakai bawŭh panah adi siabo bagŭg.

³⁵O TUHAN, Kaam grindung ka nyiramat aku; pinyita Mai bada aku timagah, ka kuasa Mai bada aku siramat.

³⁶Kaam kingat aku so dog takap. Ka aku gi-mating rabu.

³⁷Aku tadak pinganyu ku ka nakap ngara; aku dŭh re rŭŭ ndŭg ka aku mbŭh pirabur ngara.

³⁸Aku mukong ngara, ka ngara dŭh dapŭd makat, ngara tumbang arah di sirung jawin ku.

³⁹Kaam nggen pinyibake di aku yŭn biperang ka pimanang ngarah bara pinganyu ku.

⁴⁰Ka bada pinganyu ku bikaduh bu so aku; aku pirabur ngara adi tiru di aku.

⁴¹Ngara bagan mite turung, pak mating daya nyiramat ngara; ngara bagan TUHAN, pak Ayŭh dŭh nam.

⁴²Aku pirandŭk ngara ndŭg ka ngara mbŭh jadi keya ka runas adi dog poh sabak. Aku bidigang di tunduh ngara -- mun tana di aran.

⁴³Kaam nyiramat aku so daya adi gagā birawan ka bada aku jadi pimritah bangsa; bara daya adi dŭh aku puan mbŭh madin jadi urun ku.

⁴⁴Bara pinami nundok di aku; kan ngara dingah aku, ngara tunda pinganang ku.

⁴⁵Pinyipagan ngara mating tia ka ruah so kuta kuta ngara buang kimŭtŭr.

⁴⁶TUHAN udip! Muji meh pingibān ku! Piagah bās Tapa adi nyiramat aku.

⁴⁷Ayŭh nggen di aku pimanang ngarah pinganyu ku; Ayŭh na bangsa bangsa di ribo kuasa ku

⁴⁸ka nyiramat aku so bara pinganyu aku. O TUHAN, Kaam nggen di aku pimanang ngarah pinganyu ku ka grindung aku so daya ganas.

⁴⁹ Ngapŭi aku muji Kaam di dupan dudu bangsa; aku biragu muji Kaam.

⁵⁰Tapa nggen pimanang bās di raja-I; Ayŭh kiren pinyirindu-I adi dŭh bisa birubah di sianŭ adi-I mien, di David ka di sesang-i adu adu.