Read Biatah Bidayuh MAZMUR 22 Bible Online

MAZMUR 22 - Biatah Bidayuh bible

MAZMUR 22

¹[30] Tapa ku, Tapa ku, mani Kaam tagan aku? Aku mbŭh bandar bagan mite turung, pak gibabŭ gŭh mating.

²Sandu aku bagan Kaam, Tapa ku, pak Kaam dŭh nam; aku bagan singarŭm, pak dŭh tungang bŭŭs.

³Pak Kaam inŭh kudus, Raja adi Israel muji.

⁴Tayung-babuk ami bisangan di Kaam; ngara sabah di Kaam, ka Kaam nyiramat ngara.

⁵Ngara bagan Kaam ka ngara rupas so pinyusah; ngara sabah di Kaam ka dŭh asa.

⁶Pak aku dŭh tia manusia; aku ati ŭrŭd, dog ngamun ka dog pimangŭh sopŭrŭg daya!

⁷ Sopŭrŭg adi kiris aku mijŭh aku; ngara nyirimbe ka kuting ubak-i.

⁸ Ngara nang, “Kuu bisangan di TUHAN, mani meh Ayŭh dŭh nyiramat kuu? Kambŭi TUHAN suka kuu, mani Ayŭh dŭh turung kuu?”

⁹Kaam inŭh adi piruah aku ngga siramat di andu pinyibranak ku, ka kan aku gibabŭ pira, Kaam inŭh adi sita aku.

¹⁰Aku mbŭh bisangan di Kaam so andu pinyibranak ku, ka Kaam inŭh mbŭh Tapa ku.

¹¹Dŭhnyah bu so aku! Pinyusah mbŭh sindŭk, ka mating daya re turung.

¹²Bagŭ pinganyu kirurung aku keya ka dari dari sapi; ka mbŭh maning aku, keya ka dari dari sapi adi mangah so tarun tana Bashan.

¹³Ngara kuka baba-i mun singah, ngŭr nura aku.

¹⁴Pinyibake ku mating tia, miyap mun piin babas di tana. Sopŭrŭg turang ku mbŭh rudos; atin ku keya ka dian adi riris.

¹⁵Gungong[31] ku badŭh mun runas, ka jura ku rakat di rangit baba ku. Kaam mbŭh tandah aku bada kabŭs di tana.

¹⁶Tibaran daya arap agi maning aku; keya ka kaban kasong ngara nyindŭk aku; ngara nyirigat[32] tangan ngga kaja ku.

¹⁷Sopŭrŭg turang ku tungang dog kiris. Pinganyu ku tingga ka tirek aku.

¹⁸ Ngara taran dadu yŭn piraka ku ka kutung-i dupan adŭp ngara.

¹⁹O TUHAN, dŭhnyah jo so aku! Rikas mandŭg di nyiramat aku!

²⁰Nyiramat aku so pedang; nyiramat asŭng ku so dudu kasong anŭ.

²¹Pirupas aku so dudu singah anŭ; aku raru rumuh[33] di jawin dari sapi adi ganas anŭ.

²² Aku re kidaan di daya ku kayuh adi mbŭh Mai ndai; aku re muji Kaam di tika ngara tikuruk:

²³“Muji meh Ayŭh, angān adi urun TUHAN! Stabi di Ayŭh, angān adi sesang Jacob! Nyambah Ayŭh, angān daya Israel!

²⁴Ayŭh dŭh nyibireu daya sirata bait tandah ngara sangsara; Ayŭh dŭh mangān ngara, pak nam kan ngara mite turung.”

²⁵Di tika tikuruk bās aku re muji Kaam yŭn kayuh adi mbŭh Mai ndai; di sirung jawin ngara adi nyambah Kaam aku re jugan sadis adi aku mbŭh bijanji.

²⁶Daya sirata re man sikiang kiang ngara raan; ngara adi mandŭg ka TUHAN re muji Ayŭh. Isa-i ngara mujur adu adu!

²⁷Sopŭrŭg bangsa re ingat TUHAN. So barang yŭn di ong ngara re pari ka Ayŭh; sopŭrŭg bangsa re nyambah Ayŭh.

²⁸TUHAN inŭh raja, ka-I mritah barang bangsa.

²⁹Sopŭrŭg daya adi sambuh re mutu ubak ka Ayŭh;[34] sopŭrŭg adi bisa kabŭs re mutu di sirung jawin-I.

³⁰Turap turap bauh re bituan di Ayŭh; ngara re minyu pasar TUHAN di turap bauh adi re.

³¹Daya adi bayuh dog biranak re dog kidaan: “TUHAN nyiramat daya-I.”