Read Biatah Bidayuh MAZMUR 33 Bible Online

MAZMUR 33 - Biatah Bidayuh bible

MAZMUR 33

¹Sopŭrŭg ngan adi tŭnggŭn, nyirais ngga gaŭn amai kayuh adi TUHAN mbŭh ndai; muji Ayŭh, sopŭrŭg ngan adi tunda pinganang-I.

²Nggen trima kaseh di TUHAN ngga kachapi, biragu ka Ayŭh ngga kayuh pimain bitaris.

³Nang ragu bauh di Ayŭh, main kachapi ngga nakit, ka nyirais amai gaŭn!

⁴Pinganang TUHAN agi sawŭ ka sopŭrŭg pingandai-I bisa yŭn bisangan.

⁵TUHAN rindu kayuh adi tŭnggŭn ngga adi batur; ong puno ngga pinyirindu-I adi dŭh bisa birubah.

⁶TUHAN mritah rangit bada jadi, ngga pinganang-I Ayŭh bada batŭh andu, buran ka bitang bitang jadi.

⁷Ayŭh nguruk sopŭrŭg rawŭt di ndi yŭn-i; Ayŭh ngabŭt rasan rawŭt darŭm birit pinyirikŭn.

⁸Nyambah TUHAN, ndi ong ong! stabi di Ayŭh, sopŭrŭg daya di ong!

⁹Kan Ayŭh minyu, ong dog napa; ngga pinganang-I sopŭrŭg kayuh tatŭng.

¹⁰TUHAN pijimŭ pinŭtŭn pingandai bangsa bangsa; Ayŭh bada ngara dŭh pimanu kayuh adi ngara mbŭh bisatur an ndai.

¹¹Pak atur TUHAN tan adu adu; pinŭtŭn-I tan ndŭg situi tui.

¹²Sanang inŭh bangsa adi Tapa ngara inŭh TUHAN; sanang inŭh daya adi Ayŭh mbŭh mien jadi tung adŭp-I!

¹³TUHAN tingga ka sagān so shorga ka kiris sopŭrŭg manusia.

¹⁴So tarun yŭn-I mritah, Ayŭh tingga ka sagān tingga sopŭrŭg adi udip di ong.

¹⁵Ayŭh ndai pikir-kira ngara ka puan sopŭrŭg kayuh adi ngara ndai.

¹⁶Raja dŭh manang sabab kuasa bara soldadu-i; soldadu dŭh manang sabab pinyibake-i.

¹⁷Kuda kuda perang dŭh tipakai ngga dapŭd manang; pinyibake kuda dŭh dapŭd nyiramat.

¹⁸TUHAN nyibatŭh ngara adi dingah pinganang-I, ngara adi sabah di pinyirindu-I adi dŭh bisa birubah.

¹⁹Ayŭh nyiramat ngara so pinyikabŭs; Ayŭh kudip ngara di tipuh apag.

²⁰Ata harap di TUHAN; Ayŭh inŭh adi grindung ka turung ata.

²¹Ata gaŭn sabab Ayŭh; ata sabah di adŭn kudus-I.

²²Isa-i pinyirindu Mai adi dŭh bisa birubah agi ngga kieh, TUHAN, nimun kieh harap di Kaam.