Read Biatah Bidayuh MAZMUR 35 Bible Online

MAZMUR 35 - Biatah Bidayuh bible

MAZMUR 35

¹[53] Matah ngara adi matah aku, TUHAN, ka rawan ngara adi rawan aku!

²Tambit pinangin ngga piraka perang Mai ka mandŭg di turung aku.

³Pakat jarok ngga kapak Mai ngga rawan ngara adi tadak aku. Bijanji ngga aku Kaam re nyiramat aku.

⁴Isa-i ngara adi suba an siŭ aku dog ngarah ka dog pimangŭh! Isa-i ngara adi bipekat rawan aku bu buang riruk!

⁵Isa-i ngara keya ka siriyang dog poh sabak darŭm malaikat TUHAN tadak ngara!

⁶Isa-i aran ngara karŭm ka jarŭh darŭm malaikat TUHAN tadak ngara!

⁷Mating pada ngara tŭŭn jarat yŭn kudog aku ka kareh rubang tŭrŭp ngga nakap aku.

⁸Pak pinyirusag re dog ngara sibayuh ngara ngŭ-i; ngara re dog jarat adŭp ngara ka rabu buang rusag!

⁹Komŭnŭ aku re gaŭn sabab TUHAN; aku re gaŭn sabab TUHAN nyiramat aku.

¹⁰Ngga siabo atin ku aku re nang di TUHAN, “Mating daya re keya ka Kaam. Kaam grindung daya adi ramah so daya adi bake, daya adi sirata so daya adi kinanyuh ngara.”

¹¹Saksi saksi adi arap nyarah aku nyarah aku di sarah adi dŭh aku puan.

¹²Ngara maras pinyikana ku ngga arap, ka aku mbŭh raru susah.

¹³Pak kan ngara mandam, aku nēn piraka ngurid; aku pijo adŭp ku so pinguman; aku bidua ka mutu ubak ku;

¹⁴nimun aku bidua yŭn jerā puan kah jurud ku. Aku mutu ubak ku amai ngurid, mun daya adi ngurid sindŭ-i.

¹⁵Pak kan aku darŭm susah, sopŭrŭg ngara gaŭn ka tikuruk maning aku ka napat aku; daya saruh mukong aku ka adu adu mukong aku.

¹⁶Mun ngara adi napat daya bajang, ngara tirek aku ngga tiru.

¹⁷Ndŭg sinde, TUHAN, Kaam re tingga adŭ? Pirupas aku so serang ngara; nyiramat aku so singah singah anŭ!

¹⁸Komŭnŭ aku re nggen trima kaseh ka Kaam di uruk daya Mai; aku re muji Kaam di sirung jawin sopŭrŭg ngara.

¹⁹ Dŭhnyah bada pinganyu ku, bara pingadong anŭ, tawŭh aku arah. Dŭhnyah bada ngara adi tiru di aku ngga dŭh biyŭn pada tawŭh aku di punok ku.

²⁰Ngara minyu ngga gaya adi dŭh kana; pak ndai barang masam pinganang kadong pasar daya adi rindu damai.

²¹Ngara nyarah aku ka nyirais nang, “Kieh kiris pingandai mu!”

²²Pak Kaam, O TUHAN, mbŭh kiris kayuh ati. Dŭhnyah pajam, TUHAN; dŭhnyah pijo adŭp Mai!

²³Burah meh, O TUHAN, ka ngibān aku; makat meh, Tapa ku, ka turung aku.

²⁴Kaam inŭh tŭnggŭn, O TUHAN, ka kiren aku dŭh sarah; dŭhnyah bada pinganyu ku tawŭh aku.

²⁵Dŭhnyah bada ngara nang di adŭp-i, “Kieh mbŭh ngarah ayŭh! Anŭ inŭh kayuh adi raan ta!”

²⁶Isa-i ngara adi tawŭh sangsara ku bandar bandar dog ngarah ka riruk; isa-i ngara adi nang adŭp-i kana dŭ so aku raru mangŭh ka nyesar.

²⁷Isa-i ngara adi an kiris aku manang nyirais ngga gaŭn ka pari pari nang, “Munki masam bās-i TUHAN! Ayŭh munos asŭng kiris urun-I mujur.”

²⁸Komŭnŭ aku re piagah pinŭnggŭn Mai, ka aku re ndi andu andu muji Kaam.