Read Biatah Bidayuh MAZMUR 38 Bible Online

MAZMUR 38 - Biatah Bidayuh bible

MAZMUR 38

¹[57] O TUHAN, dŭhnyah ngukum aku darŭm Kaam baji!

²Kaam mbŭh kinaman aku ngga reja-panah Mai; tangan Mai mukong aku.

³Sabab baji Mai, aku mbŭh raru mandam; ndi pŭrŭng ganan ku mandam sabab dosa ku.

⁴Aku rŭnggŭd darŭm uba dosa ku; dosa ku mbŭh raru bat.

⁵Sabab aku budo gadag ku buuh ka madam.

⁶Aku mbŭh bana mudug; aku ngurid ndi andu andu.

⁷Ganan ku paras amai sungoh ka aku mbŭh sindŭk re kabŭs.

⁸Aku mbŭh raru kawŭk ka mbŭh keya ka asur; atin ku birisut, ka aku nyidaing bada andam ku.

⁹O TUHAN, Kaam puan kayuh adi natis ku; Kaam dingah sopŭrŭg sidaing ku.

¹⁰Atin ku simabog, pinyibake ku mbŭh mating, ka batŭh ku mbŭh kabur.

¹¹Bara dingan ngga rasū ku dŭh re nyindŭk aku, sabab gadag ku; ndŭg ka rawang ku pijo adŭp-i so aku.

¹²Ngara adi raan siŭ aku tŭŭn jarat an kudog aku, ka ngara adi an kandam aku mbŭh bisatur an pirusak aku; ngara bŭn ko bipekat rawan aku.

¹³Aku keya ka daya bangam dŭh dapŭd dingah, keya ka daya bawa dŭh tungang minyu.

¹⁴Aku keya ka ngara adi dŭh an nam, sabab ngara dŭh dingah.

¹⁵Pak aku sabah di Kaam, O TUHAN; ka Kaam, O TUHAN adi Tapa ku, re nam aku.

¹⁶Dŭhnyah bada pinganyu ku gaŭn amai aku susah; dŭhnyah bada ngara mingangŭn amai aku arah!

¹⁷Aku sindŭk re rabu ka aku mbŭh dŭh ko ko mandam.

¹⁸Aku ngaku dosa ku; atin ku susah amai sarah ku.

¹⁹Pinganyu ku bua sanang ka bake; bagŭ adi tiru di aku ngga dŭh biyŭn pada.

²⁰Ngara adi maras kana ngga arap mbŭh rawan aku sabab aku suba ndai kayuh adi batur.

²¹Dŭhnyah tagan aku, O TUHAN; dŭhnyah pijo adŭp Mai so aku, O Tapa ku!

²²Turung aku madin, O TUHAN adi pinyikudip ku!