Read Biatah Bidayuh MAZMUR 39 Bible Online

MAZMUR 39 - Biatah Bidayuh bible

MAZMUR 39

¹[58] Aku nang, “Aku re nakit ngga pingandai ku ka dŭh re bada jura ku bada aku bidosa; aku dŭh re nang ani ani sitadŭn daya arap agi sindŭk.”

²Aku pajam, dŭh nang ani ani, ndŭg ka dŭh nyabŭt kayuh adi kana! Pak sangsara ku tanŭ ka sera,

³ka atin ku puno ngga susah. Makin aku bipikir, makin aku susah; tanŭ ka aku mbŭh siken:

⁴“TUHAN, ndŭg sinde aku udip? Sinde aku kabŭs? Kidaan di aku sinde sirikas-i aku kabŭs.”

⁵Munki masam purok-i udip ku bada Mai! Di batŭh Mai tian-ki aku udip inŭh au-tarun. Sawŭ udip barang naan daya mating rabis-i so abus sabak,

⁶mating rabis-i so singangi. Sopŭrŭg kayuh ndai ngara inŭh yŭn au-tarun; ngara nguruk buat-rata, pak dŭh puan asi re dapu-i.

⁷Ani meh, garang, re ku harap, TUHAN? Aku na pingarap ku di Kaam.

⁸Nyiramat aku so sopŭrŭg dosa ku, ka dŭhnyah bada daya budo tawŭh aku.

⁹Aku re pajam, aku dŭh re nang ani ani, amai Kaam inŭh adi bada aku sangsara mun ati.

¹⁰Dŭhnyah tia ngukum aku! aku mbŭh sindŭk re kabŭs bada pukong Mai.

¹¹Kaam ngukum dosa ami ngga baji Mai, ka keya ka brembang Kaam pirabur kayuh adi kieh rindu. Sawŭ kieh ati mbŭh dŭh mbŭh so abus sabak!

¹²Dingah dua ku, TUHAN, ka dingah sien ku; mandŭg ka turung aku, kan aku muās. Mun sopŭrŭg tayung-babuk ku aku inŭh pingabang Mai adi nyitiro adŭ.

¹³Tandah aku sadi isa aku dapŭd sanang sibayuh aku bu ka mating tia.