Read Biatah Bidayuh MAZMUR 42 Bible Online

MAZMUR 42 - Biatah Bidayuh bible

MAZMUR 42

¹[63] Mun peyu natis piin sungi adi madŭd, simŭnŭ inŭh aku ngga Kaam, O Tapa.

²Aku jabŭng di Kaam, Tapa adi udip; sinde aku dapŭd di nyambah di yŭn pinyirŭŭ Mai?

³Sandu singarŭm aku sien, ka randang batŭh adŭ pinguman ku; pinganyu ku ari siken aku, “Diki Tapa mu?”

⁴Atin ku majot kan aku ingat kayuh adi mbŭh, kan aku ayō daya bagŭ di ka ramin Tapa ka nguru ngara darŭm ngara panu, tibaran adi gaŭn, biragu ka nyirais muji Tapa.

⁵Mani aku raru susah? Mani aku raru bipito? Aku re na pingarap ku di Tapa, ka ndi sidah dinge aku re muji Ayŭh, pinyikudip ku ka Tapa ku.

⁶Digiti di yŭn ku dog taran, atin ku majot, ngapŭi aku na pikir ku di Ayŭh. Ayŭh pait girumbang pinyusah ka simangi ku; aku dingah jawŭn riruk adi sak jawŭn uba, keya ka jawŭn piin ribuan nyatŭk Yang Jordan so Darŭd Hermon ngga Darŭd Mizar.

⁸Isa-i TUHAN kiren pinyirindu-I adi dŭh bisa birubah sandu, isa aku bisa biragu yŭn-I singarŭm, dua ka Tapa pimudip ku.

⁹Di Tapa, adi pingibān ku, aku nang, “Mani Kaam kambŭt aku? Mani aku dŭh siŭn dŭh babŭ sangsara bada gaok pinganyu ku?”

¹⁰Aku mbŭh sangsara bada pinganang ngamun ngara, darŭm ngara dŭh ko ko siken aku, “Diki Tapa mu?”

¹¹Mani aku ruai susah? Mani aku ruai bipito? Aku re na pingarap ku di Tapa, ka ndi sidah dinge aku re muji Ayŭh, pinyikudip ku ka Tapa ku.