Read Biatah Bidayuh MAZMUR 49 Bible Online

MAZMUR 49 - Biatah Bidayuh bible

MAZMUR 49

¹[76] Dingah ati, sopŭrŭg daya! Nyiringa, sopŭrŭg daya di barang yŭn,

²bās ngga adi sŭ, kaya ngga adi sirata.

³Pikir-kira ku re sanang daya mirati; aku re minyu pinganang bijak.

⁴Aku re nakit pirati pinganang pitas ka nyuse rati-i darŭm aku mambak kachapi.

⁵Aku dŭh taru di tipuh pinyusah kan aku dog kirurung pinganyu,

⁶ka ngara adi sabah di pinyikaya ngara ka mingangŭn di buat-rata bās ngara.

⁷Daya dŭh dapŭd nubos adŭp-i; ayŭh dŭh dapŭd bayar Tapa rega asŭng-i,

⁸sabab pinyibayar yŭn asŭng manusia mbŭh raru bās. Anŭ adi ngga-i bayar bŭn re sadang

⁹ngga pijo adŭp-i so rubang kubur, isa adŭp-i udip adu adu.

¹⁰Daya siŭn tingga, daya adi bijak re kabŭs gŭh, samŭn adi budo ngga adi bawa. Sopŭrŭg ngara tingge pinyikaya ngara di sesang sesang ngara.

¹¹Kubur ngara[77] inŭh arŭn ngara ndŭg situi tui; diginŭ ngara rŭŭ adu adu, sunggu ngara dawŭ-i biyŭn tana adŭp ngara.

¹²Mating pimudip bās daya re tungang nyiramat adŭp-i so kabŭs; ayŭh babŭ gŭh re kabŭs mun dāng.

¹³Tingga ani jadi ngara adi sabah di adŭp-i, nasip ngara[78] adi munos ngga buat-rata ngara --

¹⁴ngara mbŭh dog natu bada kabŭs mun biri, ka Pinyikabŭs re jadi pingingat ngara. Daya tŭnggŭn re mritah ngara, darŭm pŭrŭng ngara rikas madam di sibayan jo so arŭn adŭp ngara.[79]

¹⁵Pak Tapa re pirupas aku; Ayŭh re nyiramat aku so kuasa pinyikabŭs.

¹⁶Dŭhnyah mandam asŭng kan daya bŭkŭn jadi kaya, kan buat rata-i bitambah;

¹⁷ayŭh dŭh dapŭd taban-i kan ayŭh kabŭs; buat rata-i dŭh re sua ngga ayŭh ndŭg rubang kubur-i.

¹⁸Sunggu kambŭi ayŭh munos di pimudip-i ka dog muji daya amai udip-i mujur,

¹⁹ayŭh re sua ngga tayung tayung babuk-i, di yŭn karŭm patŭ' ruro.

²⁰Pimudip-i adi bās dŭh re tungang nyiramat ayŭh so pinyikabŭs; ayŭh babŭ gŭh re kabŭs mun dāng.