Read Biatah Bidayuh MAZMUR 5 Bible Online

MAZMUR 5 - Biatah Bidayuh bible

MAZMUR 5

¹[4] Nyiringa pinganang ku, O TUHAN, ka dingah payah ku.

²Dingah sirŭŭn ku mite turung Tapa ku ka raja ku! Aku bidua ka Kaam, O TUHAN;

³Ngga isan isan Kaam dingah sirŭŭn ku; di pinusak batŭh andu aku jugan dua ku[5] ka kajŭn pinyinam Mai.

⁴Kaam Tapa adi dŭh munos asŭng di pingandai sarah; Kaam dŭh raan kayuh arap di sirung jawin Mai.

⁵Kaam dŭh tan kiris daya adi sambuh; Kaam tiru sopŭrŭg daya adi ginaka.

⁶Kaam pirabur sopŭrŭg daya pingadong ka ngamun daya adi gaok, adi pinipu.

⁷Pak amai pinyirindu bās Mai aku dapŭd di ka ramin Mai; aku dapŭd nyambah di Ramin Mai adi kudus ka mutu ubak ka Kaam ngga stabi.

⁸TUHAN, aku biyŭn bagŭ pinganyu! Nguru aku ndai pinyiraan Mai; bada aran Mai sanang tunda ku.

⁹ Kayuh adi nang bara pinganyu ku dŭh dapŭd dog sabah; adŭ ngara raan pirabur. Pinganang ngara nganju ka duduh pak puno ngga pinŭtŭn arap.

¹⁰Sān ka ngukum ngara, O Tapa; isa-i pekat adŭp ngara pirabur ngara. Pibu ngara so sirung jawin Mai sabab dosa ngara adi bagŭ ka urah ngara adi birawan rawan Kaam.

¹¹Pak sopŭrŭg adi mbŭh pagŭng darŭm Kaam re gaŭn; ngara siŭn ari biragu amai gaŭn. Grindung ngara adi rindu Kaam; sabab Kaam ngara tŭk sawŭ sanang.

¹²Kaam nyiberkat ngara adi tunda pinganang Mai, O TUHAN; pinyirindu Mai grindung ngara keya ka pinangin.