Read Biatah Bidayuh MAZMUR 50 Bible Online

MAZMUR 50 - Biatah Bidayuh bible

MAZMUR 50

¹[80] Tapa Bisa-pŭrŭg, adi TUHAN, minyu; Ayŭh bagan ndi ong ong so timor ndŭg barat.

²Tapa nyekar so Zion, kupo adi sukup sangŭn.

³Kan Tapa ta mandŭg, Ayŭh dŭh re pajam; jireb apui agi diŭ di jawin-I, sabak ribut agi maning Ayŭh.

⁴Ayŭh bada rangit ngga ong jadi saksi bada nyaksi Ayŭh nggen bisara di bara daya-I.

⁵Ayŭh nang, “Bada tikuruk daya Ku adi tŭtŭd, ngara adi muko ndai simanya ngga Aku pakai sadis adi ngara jugan.”

⁶Rangit piagah Tapa inŭh tŭnggŭn, amai adŭp-I inŭh arang.

⁷“Dingah, daya Ku, ka Aku re minyu; Aku re nyarah kuu, Israel. Aku ati Tapa, adi Tapa ngan.

⁸Aku dŭh nyarah angān amai sadis ngan ka sadis badang ngan adi angān ari taban ka yŭn Ku.

⁹Aku dŭh biguna di dari sapi so teya teya ngan puan kah kambing adi so kaban-i;

¹⁰sopŭrŭg dāng di tarun mbŭh jaku samŭn sapi di siribu sandah.

¹¹Sopŭrŭg manuk tarun mbŭh jaku samŭn sopŭrŭg adi udip di tana.

¹²“Kambŭi Aku sibŭrŭk, Aku dŭh mite pinguman so angān, amai ong ngga barang kayuh adi agi dieh mbŭh jaku.

¹³Agi kah Aku man dagin sapi puan kah nok deya kambing?

¹⁴Bada pinganggen trima kaseh jadi sadis ngan ka Tapa,[81] ka nggen di Ayŭh adi Bisa-pŭrŭg sopŭrŭg adi angān mbŭh bijanji an nggen.

¹⁵Bagan Aku kan pinyusah mandŭg ka angān; Aku re nyiramat angān, ka angān re kibās Aku.”

¹⁶Pak Tapa nang di ngara adi ginaka, “Angān dŭh biyŭn hak nyidayŭh Pinyipesan Ku. Angān dŭh biyŭn hak minyu pasar simanya Ku.

¹⁷Angān abah bada Aku nyibatur adŭp ngan; angān tirawan pesan Ku.

¹⁸Kan angān kiris pinaku, angān bijerā ngga ngara; angān bigaur ngga bara pinanggah.

¹⁹“Angān ari minyu kayuh adi arap; angān bŭn ngang minyu kadong.

²⁰Angān sidia an nyarah madis adŭp ngan ka jiroh arap ngara.

²¹Angān mbŭh ndai sopŭrŭg anŭ, ka Aku mbŭh mating nang ani ani, jadi angān pikir Aku mun angān. Pak madin Aku nyarah angān ka bada sopŭrŭg-i tarang di angān.

²²“Dingah ati, angān adi nyipunok Aku, kambŭi dŭh Aku pirabur angān, ka mating daya re nyiramat angān.

²³Pinganggen trima kaseh inŭh sadis adi ngga stabi di Aku, ka Aku sawŭ re nyiramat daya adi stabi di Aku.”